Almatyda Turǵyn úı basqarmasy turǵyndarǵa arnalǵan saıt ashty
ALMATY. QazAqparat - Almaty qalasy Turǵyn úı basqarmasy men turǵyn úı ınspektsııasy Kskportal.almaty.kz jańa veb-saıtyn iske qosty, endi turǵyndar qajet suraqtaryn saıt arqyly qoıa alady, dep habarlaıdy QazAqparat.
Vedomstvonyń habarlaýynsha, turǵyndar endi saıt arqyly ózi turatyn úıdiń qaı páter ıeleri kooperatıvterine (PIK) qaraıtyndyǵyn, PIK-terdiń esepterin kommýnaldy kásiporyndar tarıfteri týraly aqparattardy ala alady.
«Saıtta aýdandyq ákimdikterdiń Turǵyn úı kommýnaldyq sharýashylyq bólimderiniń telefondary men meken jaılary, servıstik kompanııalar men kommýnaldyq qyzmet usynýshylar jóninde aqparattar ornalastyrylady. Sondaı-aq, saıtty qoldanýshylar jasalatyn normatıvti qujatty talqylaýǵa qatysyp, suraq qoıyp, jaýap ala alady. Bulardan ózge jańadan ashylǵan portalda PIK-terdiń reıtıngteri uıymdastyrylady»,- delingen habarlamada.
