Almatyda «Turǵylyqty mekenjaıy joq adamdarǵa arnalǵan áleýmettik beıimdeý ortalyǵynan» órt shyqty
ALMATY. QazAqparat - Búgin Almatyda «Turǵylyqty mekenjaıy joq adamdarǵa arnalǵan áleýmettik beıimdeý ortalyǵy» memlekettik mekemesiniń ǵımaratyn órt shaldy. Bul týraly Almaty qalalyq TJD-nyń resmı ókili Sandýǵash Baımuhanbetova habarlady.
«2016 jyldyń 4 aqpanynda saǵat 14.29-da «101» pýltine Túrkisib aýdanynyń Dýndıch kóshesi 2 «A» mekenjaıynda órt bolyp jatqandyǵy týraly habar kelip tústi. Órt sóndirýshiler 7 mınýtta oqıǵa ornyna kelip jetti. Belgili bolǵanyndaı, órt Almaty qalalyq Jumyspen qamtý jáne áleýmettik baǵdarlamalar basqarmasyna tıesili «Turǵylyqty mekenjaıy joq adamdarǵa arnalǵan áleýmettik beıimdeý ortalyǵynyń» eki qabatty ákimshilik ǵımaratynyń ekinshi qabatyndaǵy kabınetterdiń birinen shyqqan. Ondaǵy jıhazdar men tehnıkalar, quraldardy órt shalǵan», - dedi S. Baımuhanbetova.
Órt saldarynan ǵımarat tútinge oranǵan. Ortalyqtyń qyzmetkerleri óz betterimen ǵımarattan shyǵyp úlgergenderimen (20 adam) órt sóndirý qyzmetiniń qyzmetkerleri ǵımaratta adamdardyń bary-joǵyn anyqtaý maqsatynda bólmelerdi taǵy bir ret qarap shyqty.
«Nátıjesinde órttiń basqa kabınetterge aýyspaǵandyǵy, bólmelerde tútinge tunshyǵyp qalyp qalǵan adamdardyń joq ekendigi anyqtaldy. Tilsiz jaý 14 saǵat 56 mınýtta aýyzdyqtalyp, 15 saǵat 12 mınýtta joıyldy. Órttiń aýmaǵy 10 sharshy metrdi qurady. Zardap shekkender joq. Qazir órttiń shyǵý sebepteri anyqtalý ústinde», - dedi S. Baımuhanbetova.
Aıta ketelik, órtti sóndirýge jeke quramnyń 28 adamy men 4 arnaıy jáne 4 negizgi tehnıka jumyldyryldy.
