Almatyda turaqty negizde Uly Otan soǵysy ardagerlerin áleýmettik qoldaýdyń keń aýqymdy aktsııasy bastaldy

ALMATY. 3 mamyr. QazAqparat - Jeńis kúni qarsańynda «Uly Otan soǵysy ardagerleri, tyl eńbekkerleri jáne soǵys balalary keńesi» qoǵamdyq qory men «Kar-tel» JShS Uly Otan soǵysy ardagerlerin áleýmettik qoldaýǵa baǵyttalǵan keń aýqymdy aktsııany iske qosty.

«Kar-tel» JShS qaıyrymdylyq negizinde «4145» qysqa sımvoldyq nómirdi usyndy, onymen bos habarlama jiberýge, sóıtip, qor esebine 100 teńge jiberýge bolady. Jınalǵan aqsha medıtsına qyzmetine, úılerin jóndeýge, turmysqa kerekti zattaryn alýǵa jáne basqa da qajetterine jumsaýǵa muqtaj ardagerlerge beriledi.

Jobanyń maqsaty - Uly Otan soǵysy ardagerlerine, tyl eńbekkerlerine jáne maıdangerler jesirlerine turaqty negizde der kezinde jáne jedel kómek kórsetý.

Qor qyzmetkerleri maıdangerlerdiń úılerin aralap, turmys jaǵdaıymen tanysady, qandaı muqtajdary bar ekendigin anyqtaıdy. Almatyda 1200-ge jýyq soǵysqa qatysýshylar jáne 20 myńnan astam tyl eńbekkerleri turady. Olardyń kópshiligi qıyn jaǵdaıda ómir súrýde, dárilerge jáne qajetti zattaryna muqtaj. Soǵys ardagerleriniń kópshiligi 90 jastan asqan jáne odan da egde jasqa jetken, birqatary tósek tartyp jatyr nemese múgedekter arbasyna tańylǵan. Uly Otan soǵysy qatysýshylarynyń qatary kún sanap azaıa túsýde.