Almatyda tuńǵysh ret «Úshqońyr» medrese-kolledjiniń qyzdar bóliminiń alǵashqy túlekterine kýálik berildi
ALMATY. QazAqparat - Bıyl Almaty oblysynyń Qarasaı aýdanynda ornalasqan «Úshqońyr» medrese-kolledjiniń qyzdar bólimin 10 túlek bitirip shyqty. Bul medrese janynan qyzdar bólimi 2013 jyly Bas múftı Erjan qajy Malǵajyulynyń tapsyrmasymen ashylǵan bolatyn.
Búgin, Almatyda Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly 3 jyl boıy dinı jáne zaıyrly bilim alyp shyqqan «Úshqońyr» medrese-kolledji qyzdar bóliminiń alǵashqy qarlyǵashtaryna arnaıy kýálik tabystady.
Shara barysynda Bas múftı medrese-kolledjiniń túlekteri qoldaryna alǵan kýálikteri arqyly basqa da jastar sekildi joǵarǵy oqý oryndarynda bilimderin jalǵastyra alatynyn aıtyp, órkenıetti elder sııaqty dinı bilim berý salasynyń memleketpen tyǵyz baılanysta jumys jasaý kerektigin atap ótti.
«Búginde Dinı basqarma dinı bilim berý salasynda jańa bet burystar jasady. Sonyń biri - medreselerimiz kolledj statýsyn aldy. Medreseden bilim alyp shyqqan shákirt joǵarǵy oqý ornyna túse alady jáne memlekettik qyzmette zańdy túrde jumys isteı alady. Álemniń kóptegen órkenıetti elderiniń dinı bilim berý salasy memleketpen tyǵyz baılanysta jumys jasap keledi. Óıtkeni, qaı ýaqytta bolmasyn dinı bilimge qoǵamnyń suranysy bolǵan. Ári jat aǵym máselesi de óz sheshimin tabady. Medrese- kolledjder qoǵamdy kórkeıtýge, ımandy, óresi bıik jastardy tárbıeleýge qyzmet etedi», - dep atap ótti Erjan qajy Malǵajyuly.
QMDB baspasóz qyzmetiniń habarlaýynsha, 2015 jyly kolledj mártebesi berilgen «Úshqońyr» medresesi 2006 jyly Almaty oblysyndaǵy Qarasaı ortalyq meshitiniń janynan ashylǵan bolatyn. Búginde onda 66 shákit bilim alady. Al, bıyl dinı jáne zaıyrly bilim beretin osy oqý ornyn 16 ul jáne 10 qyz bala bitirip shyqty.
