Almatyda tuńǵysh ret short-trekten álem kýbogynyń kezeńi ótedi
ASTANA. QazAqparat - 7-9 jeltoqsan aralyǵynda Almatydaǵy «Halyq Arena» sport kesheninde short-trekten álem kýbogynyń úshinshi kezeńi ótedi, dep habarlaıdy QazAqparat tilshisi.
QR Ulttyq olımpıadalyq komıtetiniń baspasóz qyzmeti málim etkendeı, Qazaqstannyń halyqaralyq jarystardy ótkizý tájirıbesiniń joǵary ekenin eskergen Halyqaralyq konkıshiler federatsııasy (ISU) Almatyǵa álem kýbogy kezeńin alǵash ret senip tapsyryp otyr.
Álem kýbogy short-trekten ótetin eń iri halyqaralyq jarys sanalady. Almatyǵa alǵash ret short-trek juldyzdary qadam baspaq. Búginge deıin álemniń 18 memleketinen 151 sportshy ótinim berip úlgerdi.
Elimizge ISU-dyń úzdik uıymdastyrýshy mamandary da at basyn tireıdi. Atap aıtar bolsa, ISU-dyń tehnıkalyq komıtetin Kanadadan shyqqan Olımpıada chempıony Natalı Lambert bastap kelmek. Ol 1992 jylǵy qysqy Olımpıada oıyndarynda bir altyn, eki kúmis jeńip alǵan. Sondaı-aq, kópsaıys boıynsha álem chempıonattarynda úsh ret top jarǵan.
Jarysty joǵary deńgeıde uıymdastyrýǵa elimizdiń sport salasyndaǵy úzdik mamandar jumyldyrylyp otyr. Atap aıtar bolsaq, 2011 jylǵy Azııa oıyndary men 2017 jylǵy Ýnıversıadany uıymdastyrǵan kásibı mamandar jumysqa tartylýda.
Short-trekten Qazaqstan ulttyq quramasynyń bas bapkeri Mádiǵalı Qarsybekov óz jerimizde ótetin dodada el namysyn kimder qorǵaıtynyn málimdedi.
Almaty aıdynynda tómendegi sportshylarymyz júldege talasady:
Áıelder: Álııa Kım, Anastasııa Krestova, Olga Tıhnonova, Ásel Taıshymanova, Anıta Nagaı, ıAna Han.
Erler: Abzal Ájiǵalıev, Nurbergen Jumaǵazıev, Denıs Nıkısha, Mersaıt Jaqsybaev, Erkebulan Shamuhanov jáne Ádil Ǵalıahmetov.
Short-trekten Qazaqstan quramasy Sochı Olımpıadasynan beri álemdik syndarda sátti óner kórsetip keledi. 2014 jylǵy Olımpıadada estafetadan bizdiń qurama besinshi oryn alǵan bolatyn.
2016-2017 jylǵy maýsymda Qazaqstan quramasy álem kýbogi kezeńderinen toǵyz medal jeńip aldy. Onyń úsheýi - altyn.
Óz jerimizde ótken Ýnıversıada oıyndarynda short-trek sheberleri bes qola men bir kúmiske qol jetkizdi. Al Phenchhandaǵy qysqy Olımpıadaǵa Qazaqstan komandasy jeti joldama ıelengen bolatyn.
Bıylǵy maýsym da sportshylarymyz úshin jaman bastalǵan joq. Kalgarıde ótken álem kýboginiń alǵashqy kezeńinde Abzal Ájiǵalıev úsh birdeı Olımpıada chempıonymen jarysyp, kúmiske ıelik etti.
AQSh-ta ótken ekinshi kezeńde Denıs Nıkısha úzdik tórttik qatarynan kórindi.
