Almatyda tuńǵysh ret shoppıng festıvali ótedi
ALMATY. 6 qyrkúıek. QazAqparat - Almatyda tuńǵysh ret 14-23 qyrkúıek kúnderi «Almaty Shopping Festival» ótedi. Ony Almaty qalasy ákimdiginiń qoldaýymen Qazaqstandaǵy dıskonttyq qyzmet kórsetetin Chocolife.me kompanııasy uıymdastyryp otyr.
Asa aýqymdy saýda-sattyq festıvali kezinde almatylyqtar ǵana emes, qala qonaqtary da shahardaǵy iri dúkender men ózge de saýda oryndarynda jeńildikter paıdalaný múmkindigine ıe bolmaq. Ony Qazaqstanda kásipkerlik, týrızm men mádenıetti damytýǵa baǵyttalǵan zor qadam deýge bolady. Oǵan qatysýshylar ótken maýsym kollektsııasyn ǵana emes, jańa sán úlgisinde tigilgen kıimderdi de jeńildikpen satyp alýǵa múmkindik alady. Al, jeńildik kólemi brendke tikeleı baılanysty bolmaq.
«Bul sharaǵa kóptegen týrıster qatysatynyna senimdimiz. Biz Almatynyń Qazaqstannyń mádenı kásipkerlik jáne týrızm ortalyǵy retindegi bedelin nyǵaıtqymyz keledi. Bul festıval - bizdiń qalamyzda osy klasterdi damytýǵa baǵyttalǵan taǵy bir mańyzdy qadamǵa aınalmaq», - deıdi Almaty qalalyq týrızm basqarmasynyń bólim bastyǵy Álııa Myrzahmetova. Chocolife.me qazaqstandyq dıskont servısiniń dırektory Ramıl Mýhorıapovtyń aıtýynsha, oǵan 30 myńnan astam adam qatysady dep josparlanýda. Onyń 3 myńnan astamy qalaǵa kelgen qonaqtar bolmaq. Festıval qala qazynasyna túsetin salyqtyq túsimderdi arttyrady. Al, bul Almaty qalasynyń qarjylyq jáne mádenı ortalyq retindegi bedelin nyǵaıta túsedi. Bul buryn-sońdy bolmaǵan úlken oqıǵa jáne ol jyl saıyn ótkiziletin bolady.
Máselen Dýbaıdaǵy «Dubai Shopping Festival» kezinde 2011 jyly 400 mln. dollar tabys túsken. Onda ámbebap dúkenderdegi saýda-sattyq kólemi 57 %, bólshek saýda-sattyq 49% (133,4 mln$), qonaq úıler men appartamentterde 25% (90,6 mln$), oıyn-saýyq qyzmeti 40% (29 mln$) artqan.
