Almatyda tuńǵysh ret qazaq blogshylarynyń álemge tanymal barkemp formatyndaǵy beıresmı jıyny ótedi

«Blog quryltaı» nemese blogshylardyń beıresmı jıynynyń negizgi maqsaty - qazaqtildi jańa medıanyń damýyna yqpal jasap, onyń sapasyn arttyrý. Oǵan Qazaqstannan 150-den astam blogshy qatysýǵa nıet bildirgen. Sonymen qatar shetelde (Qytaı, Mońǵolııa, Frantsııa) turyp jatqan qazaq dıasporasynyń ókilderi de kelmek. Jańa medıaǵa qyzyǵýshy top eki kún boıy ózderiniń jobalarymen bólisip, jasaǵan baǵdarlamalaryn usynady, seriktester taýyp, qarym-qatynas jasamaq.

Qazirgi tańda shamamen 300-ge tarta belsendi qazaqtildi blog bar eken. Olardyń basym bóligi álemdegi eń tanymal blog-platformasynyń biri wordpress.com-da shoǵyrlanǵan. Qazirgi kezde blogshylarǵa ózderin tolǵandyrǵan máselelerdi offlaın rejımde ashyq talqylaýǵa múmkindik beretin pikirtalas alańy jetpeı júrgen kórinedi. Dál osy maqsatta aty atalǵan uıymdar blogshylardyń basyn biriktirýdi jón dep sanaǵan.

Jıyn tusaýkeser, sheberlik synyptar, talqylaý, beıresmı otyrystar, kezdesýler túrinde ótedi. Onda negizinen jańa medıa, áleýmettik jeliler, blogtyń damýy sııaqty qaznettegi ózekti máseleler talqylanbaq.

Blogkemp aıasynda tuńǵysh ret uıymdastyrylyp otyrǵan blogtar baıqaýy jáne úzdik jobalarǵa qarjylaı qoldaý kórsetý baǵdarlamasynyń nátıjesi belgili bolady. Baıqaýdyń maqsaty - qazaq blogosferasynyń damýyna jaǵdaı jasaý, blogshylardy yntalandyrý ári jańa jobalardyń paıda bolýyna járdemdesý.

"Qaznette sheshilmegen problemalar kóp ekenin bárimiz bilemiz. Bul jıynnyń ereksheligi - qatysýshylar máselelerdi abstraktyly túrde kóterip qana qoımaı, onyń sheshý joldaryn usynady",- deıdi «Minber» jýrnalısterdi qoldaý ortalyǵynyń ókili Ashat Erkimbaı.

Jıynǵa tanymal ІT-kompanııalar, túrli uıymdar demeýshilik tanytyp otyr. Atap aıtqanda, seriktes uıymdastyrýshy - QMEBI, bas demeýshi - Kcell kompanııasy, tehnıkalyq demeýshi «Qazaqtelekom» AQ. Sonymen qatar jıyndy qoldaýshylardyń arasynda Nokia, HP syndy iri kompanııalar bar.