Almatyda tuńǵysh ret dárýmender men mıneraldar festıvali uıymdastyryldy
ALMATY. Shildeniń 16-sy. QazAqparat /Názıra Eleýhan/- Búgin Almatyda tuńǵysh ret dárýmender men mıneraldar festıvali bolyp ótti.
Qazaq taǵamtaný akademııasy men ACIERTO kompanııasynyń uıymdastyrýymen ótken festıvalǵa 10-nan asa kompanııa men fırmalar qatysty. Ár kelýshige kórme boıynsha arnaıy ekskýrsııa uıymdastyryldy. Tutynýshylar suıyq túrdegi dárýmenderge degýstatsııa jasaýǵa múmkindik aldy. Ár qatysýshy óz taýarlaryn usynyp, ár túrli atalymdar boıynsha sapa- baıqaýyna qatysty. Saraptama komıssııasy eń úzdik dep tanylǵan "Nıkomed", "Farko" "Fıtoleým" jáne "Art-laıf" kompanııalaryn arnaıy dıplomdarmen marapattady. Al kópshilik dárigerlerdiń kóńilinen shyqqan "Vıta Farm+" jáne "Omega-3 Kardıo" kompanııalary "Dárigerler kózaıymy" júldesiniń ıegerleri atandy.
Qazaq taǵamtaný akademııasynyń vıtse-prezıdenti Igor Tsoıdyń aıtýynsha, mundaı shara tutynýshylarǵa jáne búgin arnaıy kelgen dárigerlerge tikeleı taýar óndirýshilermen áńgimelesýge jáne preparattary týraly tolyq aqparat alýǵa múmkindik beredi. "Aldaǵy ýaqytta bul sharany dástúrli túrde ótkizýdi josparlap otyrmyz. Búgin ókinishke oraı, elimizde jumys isteıtin 200 kompanııanyń 10-y ǵana qatysty. Bolashaqta qatysýshylar sany artady degen senimdemin. Bul shara eń aldymen halyqtyń dárýmender týraly aqparattandyrý úshin uıymdastyrylyp otyr. Aqparattyń azdyǵynan kópshiligi dárýmendi kúndelikti tamaq ratsıonyna engizip, ishý kerek ekendigin bile bermeıdi. Dárýmender kóptegen aýrýrlardyń aldyn alýda paıdasy zor", dedi ol.
Festıval barysynda kelýshiler ár túrli baıqaýlar men lotereıa oıyndaryna qatysyp, óndirýshilerdiń kishigirim syılyqtaryna ıe boldy. Sondaı-aq balalarǵa salaýatty ómir saltyn nasıhattaıtyn fılmder kórsetildi.
