Almatyda tuńǵysh ret tserebraldy sal aýrýymen týǵan 18 jastaǵy naýqasqa ota jasaldy
«Neırohırýrgten zergerge tán sheberlikti qajet etetin kúrdeli operatsııa 6 saǵatqa sozyldy. Ota barysynda biz mıkroskop arqyly neıromonıtorıng jasap otyrdyq. Nátıjesinde belgili bir bulshyq etterdiń jumysyna jaýap beretin júıke júıelerinde aqaý bary anyqtaldy. Bylaısha aıtqanda, bulshyq etterdi qursap, patsıenttiń júrip-turýyn qıyndatqan júıke talshyqtary alynyp tastaldy», - deıdi OQKA Neırohırýrgııa bóliminiń meńgerýshisi Marat Almatov.
Selektıvti dorsaldy rızotomııa – tserebraldy sal aýrýymen týǵan naýqastardyń qurysqan bulshyq etin jumsartyp, qımyl-qozǵalysty retteýge arnalǵan operatsııa. Ota barysynda dáriger julynnyń tómengi bóligindegi sensorlyq qabyqshalardy ishinara alyp tastaıdy. Bul aıaq-qoldyń qurysýyn azaıtyp, naýqastyń jaǵdaıyn edáýir jaqsartýǵa múmkindik beredi.
Dárigerlerdiń aıtýynsha, mundaı ota balalyq shaqta jasalýy qajet. Bul sal aýrýymen aýyratyn patsıenttiń qımyl-qozǵalysyn jeńildetip, júrisin qalypqa keltirer edi. Alaıda patsıent mamandar kómegine 18 jasqa tolǵannan keıin ǵana júgingen. Osy jasqa deıin qımyl-qozǵalys shektelýinen zardap shegip kelgen jas jigit qazir óz betinshe júrip-turady. Búginde aýrýhanadan shyǵýǵa daıyndalyp jatyr.
«Keıin patsıent reabılıtatsııadan ótýi tıis. Operatsııa sátti ótti. Degenmen, onyń nátıjesin kúsheıtý úshin uzaq ýaqyt medıtsınalyq ońaltýdan ótý qajet», - deıdi maman.
Operatsııany ortalyq klınıkalyq aýrýhana neırohırýrgi Marat Almatov, №2 qalalyq balalar aýrýhanasy neırohırýrgi Azamat Jaıylǵanov pen nevrolog-neırofızıolog Gúlnur Qasenova jasady.
Aıta ketsek, medıtsınalyq saqtandyrý júıesi engizilgennen keıin Almaty qalasy densaýlyq saqtaý salasynyń bıýdjeti edáýir artty. Bıyl salaǵa 243,5 mlrd teńge qarastyrylǵan, bul – byltyrǵy bıýdjetten 17,3 protsent artyq. Onyń 136,4 mlrd teńgesi – tegin medıtsınalyq kómek paketine, 107,1 mlrd teńgesi – MÁMS paketine tıesili.
