Almatyda tuńǵysh ret «Ashyq kósheler» festıvali ótedi
ALMATY. QazAqparat - Almatyda 11 qazanda tuńǵysh ret «Ashyq kósheler» festıvali ótedi. Bul týraly búgin Almaty qalalyq Mádenıet basqarmasynyń baspasóz qyzmetinen habarlady.
Festıval aıasynda Qarasaı batyr, Panfılov jáne Áıteke bı kósheleri men Abylaı han dańǵylynda tańǵy saǵat 09:00-den 14:00-ge deıin avtokólik qozǵalysy ýaqytsha toqtatylady. Kósheler qala turǵyndarynyń paıdalanýyna beriledi. Onda azamattar emin-erkin dem alyp, serýen quryp, velosıped tebe alady. Sonymen qatar, «Ashyq kósheler» festıvaline kelgender sport jáne bı baıqaýlaryna qatysatyn bolady. Sýret salyp, ıogamen aınalysýǵa da múmkindik bar. Budan ózge, qala turǵyndary jol qozǵalysy qaýipsizdigi týraly teatrlandyrylǵan kórsetilimdi tamashalaı alady. Al festıvaldiń saıabaqtyq aımaǵynda mobıldi kitaphana, velosıped tebýdi úıretý boıynsha sheberlik synyby jáne Panfılov kóshesinde ornalasqan metro beketi aldynda veloprokat uıymdastyrylady. Sonymen qatar, sol kúni tańǵy saǵat 08:00 ben 09:00 aralyǵynda velosherý uıymdastyrylady. Oǵan qatysýshylar Abaı dańǵylynan bastap, Abylaı dańǵyly boıymen Astana alańyna deıin júrip ótedi.
