Almatyda tuńǵysh ret ashyq aspan astyndaǵy zamanaýı ónerdiń «ArtBatFest-2010» atty festıvali ótedi
ALMATY. Tamyzdyń 21-i. QazAqparat /Názıra Eleýhan/ - Búgin Almatydaǵy Arbat alańynda birinshi ret ashyq aspan astyndaǵy zamanaýı ónerdiń «ArtBatFest-2010» atty halyqaralyq festıvali ótedi, dep habarlaıdy QazAqparat.
Halyqaralyq festıvalde barlyq kelýshiler músinderdiń qoıylymdarymen tanysyp, ár senbi kúni beıne jáne fotoart, teatr jáne keskindeme aptalyǵyna qatysýǵa múmkindik alady.
Qala ákimdiginiń qoldaýymen uıymdastyrylatyn sharanyń basty maqsaty - halyqty qorshaǵan ortany qorǵaý máselesine nazar aýdartý.
Uıymdastyrýshylardyń aıtýynsha, Arbatqa Moldaqul Narymbetov, Sáken Narynov, Georgıı Trıakın-Býharov syndy tanymal sýretshilerdiń týyndylarymen qatar, jas músinshiler men sýretshilerdiń shyǵarmalary da qoıylmaq.
Festıval qazan aıynyń 2-ne deıin ótetin bolady.
