Almatyda tuńǵysh ret ár saǵat saıyn klassıkalyq shyǵarmalar oınaıtyn mýzykalyq saǵat iske qosyldy
ALMATY. 6 jeltoqsan. QazAqparat /Názıra Eleýhan/ - Almatydaǵy Qurmanǵazy atyndaǵy Qazaq ulttyq konservatorııasy ǵımaratynda ornalasqan qalalyq munara saǵaty endi ár saǵat saıyn mýzyka áýenin oınaıtyn bolady.
Jańasha júretin saǵatty qosý saltanaty Almatyda atalyp ótildi.
Qazkommertsbanktiń bastamasymen qolǵa alynǵan ıdeıany iske asyrý 2009 jyly bastalǵan. Aǵymdaǵy jyly qazan aıynda saǵattyń mehanızmi tolyǵymen aýystyrylyp, saǵattyń dızaıny ózgertildi. Mýzykalyq saǵattyń jumysyn 13 qońyraýdan turatyn avstrııalyq Schauer&Sachs kúrdeli konstrýktsııasy qamtamasyz etetin bolady. Qońyraýlardyń barlyǵy kompıýterge qosylǵan. Basqarý men áýender saǵatqa qoıylǵan kompıýter baǵdarlamasy arqyly aýysyp otyrady. Sondaı-aq, saǵat mehanızmi GPS-navıgatsııa quralymen jabdyqtalǵan, ol saǵattyń dál júrýin baqylaýdy qamtamasyz etedi.
«Saǵat álemdik jáne qazaqstandyq klassıkalyq mýzykalardy oınaıdy, ol ózinshe bir ár túrli ýaqyt pen mádenıettiń, ár kezeńdegi almatylyq býynnyń jalǵasynyń sımvoly bolmaq. Biz úshin qalanyń jaqsy jaqa qaraı ózgerýi mańyzdy»,-dedi «Qazkommertsbank» AQ-nyń Basqarýshy dırektory Maǵjan Áýezov. Onyń aıtýynsha, bul Qazkommertsbanktiń el táýelsizdiginiń 20 jyldyǵyna arnaǵan on tórtinshi syıy.
«Qazkommertsbanktiń bastamasyn biz birden qoldadyq. Mýzykalyq saǵattar álemniń kóptegen qalalarynda bar. Olar qalaǵa erekshe áýenimen kórik berip keledi, máselen, Londondaǵy Bıg Bendi atap aıtýǵa bolady. Búgin iske qosylǵan bul saǵat ta Almaty qalasynyń bir sımvolyna aınalady degen úmittemiz»,-dedi saltanatty rásimde Qurmanǵazy atyndaǵy Qazaq ulttyq konservatorııanyń rektory Jánııa Áýbakirova.
