Almatyda Tuńǵysh Prezıdent kúnine arnalǵan jıyn ótti
«Elbasy Nursultan Nazarbaev – álemdik deńgeıdegi saıasatker» taqyrybyndaǵy jıynǵa belgili saıasatkerler, ǵalymdar, joǵary oqý oryndary men ǵylymı-zertteý mekemeleriniń qyzmetkerleri qatysty.
Shara barysynda, Sh. Ýálıhanov atyndaǵy Tarıh jáne etnologııa ınstıtýty dırektorynyń keńesshisi, professor Saıyn Borbasov ulttyq ıdeologııany ulyqtaýdaǵy «Rýhanı jańǵyrý» baǵdarlamasynyń róli týrasynda áńgime qozǵady.
«Rýhanı jańǵyrý – óte kúrdeli, kóp jaqty keń aýqymdy qubylys. Bul úrdisti qalyptastyrý ekonomıkalyq jańarý úrdisin qalyptastyrýdan da qıyn. Sebebi halyqtyń sanasyn, dúnıetanymyn jáne is-áreketti tańdaýyn tárbıeleý ońaı sharýa emes. Bul jumys - belgili bir tarıhı merzimdi qamtıtyn uzaq úderis. Rýhanı jańǵyrýǵa árbir azamat, árbir otbasy óz úlesterin qosýǵa mindetti. Tárbıeniń, ulttyq qundylyqtardyń tamyry tal besikten bastalatyny aqıqat. ıAǵnı, rýhanı jańǵyrý memlekettiń mindeti dep qarap otyrýǵa bolmaıdy. Árbir otbasynda qazaq halqynyń ana tiline, tól mádenıetine, ańyz-ertegilerine, ulttyq salt-dástúrlerine degen qurmet qalyptassa, el halqynyń adamgershilik kelbeti túzeledi», – dep atap ótti Saıyn Borbasov óz sózinde.
Sonymen qatar, jıynǵa qatysqan ǵalymdar Elbasynyń ǵalamdyq qaýipsizdikti qamtamasyz etýdegi ıdeıalarynyń ómirsheńdigi men álemdik saıasat sahnasyndaǵy bedelin tilge tıek etti.
«28 jylda elimizdi kúlli álem tanyp, moıyndady. Halyqaralyq saıasattaǵy Elbasynyń ıdeıalary álemge úlgi boldy jáne Nazarbaevtyń yqpalymen Qazaqstan ıadrolyq qarýdan bas tartty. Osy jáne ózge de ister jahandyq damýdyń jańa strategııasyna aınaldy»,– deıdi Abaı atyndaǵy Qazaq ulttyq pedagogıkalyq ýnıversıtetiniń professory Jomart Sımtıkov.
Sondaı-aq jıynǵa qatysýshylar ulttyq mádenıet, ulttyq sana men rýh týrasynda paıymdy oılarymen bólisip, stýdentter tarapynan qoıylǵan saýaldarǵa jaýap berdi.
