Almatyda Tuńǵysh Prezıdent qory shákirtaqysynyń ıegerleri anyqtaldy
ALMATY. 14 qyrkúıek. QazAqparat /Názıra Eleýhan/ - Búgin Almatyda Qazaqstan Respýblıkasy Tuńǵysh Prezıdenti Qorynyń stýdenttik shákirtaqysyn qarastyrýǵa jarııalanǵan respýblıkalyq baıqaý jeńimpazdaryn marapattaý rásimi bolyp ótti.
Baıqaýǵa Qazaqstan Respýblıkasynyń joǵary jáne orta arnaýly (mádenıet jáne óner) oqý oryndarynda "óte jaqsyǵa" oqıtyn, óz jetistikterin baıandamalarymen, jarııalanymdarymen, is-sharalarda sóılegen sózderimen, syılyqtarymen rastaǵan, qoǵamdyq, ǵylymı-zertteý, mádenı-kásiptik jáne tájirıbelik qyzmetterde belsendilik tanytqan stýdentter qatysty. Jeńimpazdardy anyqtaý osydan úsh aı buryn bastaldy.
Qazaqstan Respýblıkasy Tuńǵysh Prezıdenti Qorynyń atqarýshy dırektory Bektas Muhamedjanovtyń aıtýynsha, bıyl baıqaýǵa Astana, Almaty, Aqtóbe, Shymkent, Túrkistan, Taraz, Qyzylorda, Qaraǵandy, Qostanaı, Oral, Pavlodar, Petropavl, Semeı qalalarynan 180-nen astam ótinish kelip túsken. «Bıyl ótinishter kólemi ótken jylǵa qaraǵanda eki ese kóp boldy, sanymen qatar sapasy men mazmuny da jaqsardy. Bul biz úshin qýantarlyq jaǵdaı. Bıyl baıqaýǵa T. Júrgenov atyndaǵy Óner akademııasynyń, Qurmanǵazy atyndaǵy Qazaq ulttyq konservatorııasynyń jáne Seleznev atyndaǵy horeografııalyq ýchılışesiniń stýdentteri belsendi atsalysty. Biz aldaǵy ýaqytta, elimizdiń basqa oqý oryndarynan da qatysýshylar kóp bolsa dep tileımiz»,-dep atap ótti B. Muhamedjanov marapattaý rásiminde.
Stýdentterdiń bilim, ǵylym jáne shyǵarmashylyq qyzmetterin yntalandyrý syılyǵy retinde jarııalanǵan baıqaý osymen ekinshi ret ótkizilip otyr.
Sonymen Qazaqstan Respýblıkasy Tuńǵysh Prezıdenti Qorynyń stýdenttik shákirtaqysyna 30 stýdent ıe boldy. Talaptarǵa saı kelgen, oqýda ozat, qoǵamdyq ómirge belsene qatysyp, halyqaralyq dodalarda top jarǵan bul jastar endi bir jyl oqý merziminde 10 myń teńge kóleminde shákirtaqy alyp turatyn bolady.
