Almatyda túngi ýaqytta jasyl jelekterge bıologııalyq óńdeý jumystary júrgizilýde
ALMATY. QazAqparat - Almatyda shildeniń 19-nan 20-syna qaraǵan túni aýrý men zııankesterden qorǵaý maqsatynda jasyl jelekterge bıologııalyq óńdeý jumystary júrgizildi, dep habarlaıdy QazAqparat tilshisi.
Almaty qalalyq ekologııa basqarmasynyń málimetinshe, Áýezov aýdanynyń Qoıshymanov kóshesinde (Shalıapın-Saın kósheleri arasy), Beregovaıa kóshesinde (Jandosov- Shalıapın kósheleri arasy), Saın jáne Abaı kósheleri, Raıymbek jáne Momyshuly kósheleri qıylysyndaǵy jolaıryq boıynda, «Taýgúl-1» yqsham aýdanyndaǵy botanıkalyq baqta bıologııalyq óńdeý jumystary júrgizildi.
«Jumys barysynda Qazaqstan aýmaǵynda qoldanýǵa ruqsat etilgen «Green Gold» sertıfıkattalǵan bıologııalyq preparaty qoldanyldy. Bul preparat zııankesterdiń sanyn naqty baqylaýdy, sondaı-aq uzaq merzimdi qorǵaýdy jáne joǵary tıimdilikti qamtamasyz etedi»,- dep habarlady basqarmada.
