Almatyda túngi nóser saldarynan keıbir úıler sý astynda qaldy
ALMATY.QazAqparat- Almatyda 15 tamyzda jaýǵan jańbyr saldarynan qala aýdandaryndaǵy keıbir jeke turǵyn úıler, irgeles jatqan aýlalar, jertóleler men kólik qıylystary sý astynda qaldy, dep habarlaıdy QazAqparat tilshisi.
Almaty qutqarý qyzmetindegi «109» nómirine turǵyndardan qońyraýlar tańerteńgi saǵat 04: 31-de túse bastady. Barlyǵy 13 shaǵym tústi. Qutqarýshylar negizinen Alataý aımaǵyndaǵy mekenjaılarǵa attandy. Onda sý basý qaýpi boldy. Aqbulaq yqshamaýdanyndaǵy Beısekbaeva kóshesindegi sý sorý jumysy qazir aıaqtaldy. Munda tórt jeke turǵyn úıdi jańbyr sýy basqan.
Samadı, Nurpeıisov jáne Sýhe-Bator kóshe turǵyndarynan «109» nómirine qońyraýlar kóptep túsken. Turǵyndar aýlany, jertóleni jáne jeke turǵyn úılerdi sý basqandyǵy týraly shaǵymdanǵan. Bul mekenjaılar boıynsha Alataý aýdanynyń merdigerler kompanııalary jumys istedi.
Áýezov aýdanynda Raıymbek dańǵyly men Saın kóshesiniń qıylysy da jańbyr sýynyń astynda qaldy. Sý basý zardaptaryn aýdan ákimshiligi jáne «Almaty Sý» kommýnaldyq qyzmeti birlesip joıdy.
Qutqarý jumystaryna Almaty qalalyq qutqarý qyzmetiniń 9 qyzmetkeri, 2 tehnıka jáne 4 sý sorǵysh motor jumyldyryldy.
