Almatyda túnde saýyq-saıran qurǵan jastar jaýapqa tartylýy múmkin
ALMATY. QazAqparat - Almaty polıtsııasy jastardyń túngi ýaqyttaǵy oıyn-saýyqtaryna qatysty túsinikteme berdi, dep habarlaıdy QazAqparat tilshisi.
Uıaly telefonǵa túsirilgen beınejazba kris_p_almaty Instagram paraqshasynda paıda boldy. Onda jastardyń arnaıy kostıýmder kıip alyp bılep júrgenderin kórýge bolady. Sonymen qatar, qymbat kóliktermen drıft uıymdastyrǵan. Boljam boıynsha vıdeo janarmaı quıý beketi men kólik turaqtarynyń birinde túsirilgen.
Almaty qalalyq PD baspasóz qyzmetiniń habarlaýynsha, jergilikti polıtsııa qyzmeti tekserý jumystaryn júrgizip jatyr. Osy vıdeoǵa túskenderdiń árqaısysyn anyqtaıtyndaryn jetkizdi.
«Polıtsııa olardyń árqaısysyna, sonyń ishinde kólik júrgizýshileriniń áreketterine quqyqtyq baǵa beredi. Bul is QR Ákimshilik quqyq buzýshylyq týraly kodeksiniń (túnde tynyshtyqty buzý) baby boıynsha qaralýy múmkin. Ár jaǵdaıdy jeke-jeke qaraıtyn bolamyz. Zańǵa sáıkes olardyń árqaısysy jaýap beredi», - dedi polıtsııa ókilderi.
