Almatyda túnde qydyrýǵa shyqqan balalardyń ata-analary aıyppul tóledi
ALMATY. QazAqparat – Almatyda «Jasóspirim» jedel-aldyn alý is-sharasynyń birinshi kezeńi ótti. Balalaryn kóńil kóterý oryndaryna jibergen ata-analar aıyppul tóledi, dep habarlaıdy QazAqparat tilshisi.
«Sharanyń maqsaty - kámeletke tolmaǵandar arasyndaǵy quqyq buzýshylyqtyń aldyn alý jáne boldyrmaý, kámeletke tolmaǵandarǵa alkogol jáne temeki ónimderin satý faktilerin anyqtaý, oıyn-saýyq mekemelerge túngi ýaqytta, zańdy ókilderinsiz barǵan kámeletke tolmaǵandardy anyqtaý. Atalǵan keshendi sharaǵa PD-niń jeke quramy, jergilikti atqarýshy organdardyń, prokýratýranyń, bilim berý, densaýlyq saqtaý organdarynyń, sondaı-aq «Nur Otan» partııasynyń jastar qanaty fılıaly ókilderi jumyldyryldy», - deıdi Almaty qalalyq ıývenaldy polıtsııa basqarmasynyń bastyǵy Láılá Álipbaeva.
Shara barysynda polıtsııa basqarmasyna barlyǵy 296 jasóspirim jetkizildi. Jasóspirimder jasaǵan 284 ákimshilik quqyq buzýshylyq anyqtaldy, 12 balanyń kezbelikke salynǵandyǵy belgili boldy. Olar kámeletke tolmaǵandardy beıimdeý ortalyǵyna ornalastyryldy. Sonymen qatar, Іshki ister organdarynyń tizimine alynǵan 20 jasóspirim, 25 qolaısyz otbasy alyndy.
Sondaı-aq, balalary túngi ýaqytta oıyn-saýyq mekemelerinde jáne úılerinen tys jerlerde júrgeni úshin 242 ata-ana ákimshilik jaýapkershilikke tartyldy. Kóńil kóterý mekemeleriniń 6 laýazymdy tulǵasyna qatysty ákimshilik isterdiń materıaldary kámeletke tolmaǵandardyń isteri jónindegi mamandandyrylǵan aýdanaralyq sotqa jiberildi.
«Budan bólek, qalanyń saýda oryndarynda kámeletke tolmaǵandarǵa ishimdik men temeki satqan 9 fakti anyqtaldy. Іs-shara barysynda kóshede jáne panasyz qalǵan kámeletke tolmaǵandardy, sondaı-aq balalar eńbegin paıdalaný faktilerin anyqtaý maqsatynda bazarlarda, oıyn-saýyq oryndarynda, temirjol vokzaldarynda, qoǵamdyq oryndarda jáne qala kóshelerinde reıd júrgizildi», - dep qortyndylady Láılá Álipbaeva.
