Almatyda tún jarymynda jarysqan júrgizýshilerge 1,6 mln teńge aıyppul salyndy
ALMATY. QazAqparat – Almatyda túnde jarys uıymdastyrǵan júrgizýshilerge 1,6 mln teńge aıyppul salyndy, dep habarlaıdy QazAqparat tilshisi.
Almaty qalalyq polıtsııa departamentiniń basshysy Qanat Taımerdenovtyń aıtýynsha, jarysty kóbine jastar uıymdastyrady.
«Jastar qaýip tóndirip, qala kóshelerinde jarys uıymdastyrady. Sonymen qatar, olar kólikterine ózgeris engizip, tyıym salynǵan jabdyqty, onyń ishinde túnde qatty dybys shyǵaratyn rezonatorlardy ornatady. Bul qala turǵyndarynyń shaǵymdaryna sebep bolady. Osyndaı faktilerdi toqtatý maqsatynda polıtsııanyń aldyńǵy sheptegi bólimsheleri apta saıyn reıd ótkizedi»,- deıdi ol.
Sonymen qatar, ol jyl basynan beri 65 júrgizýshi ákimshilik jaýapqa tartylǵanyn jetkizdi.
Salynǵan aıyppul mólsheri - 1,6 mln teńge.
«Bul sharalar jol qaýipsizdigi deńgeıin arttyrýǵa baǵyttalǵan. Kún saıyn keshke jáne túnde joldy eki patrýldik narıad baqylaıdy»,- dedi Almatynyń bas polıtseıi.
