Almatyda tún jarymynda jarysqan 36 júrgizýshi ustaldy
ALMATY. Qazaqparat – Ótken demalys kúnderi Almaty joldarynda jarys uıymdastyrǵan 36 júrgizýshi ustaldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, júrgizýshiler kólikterine ózgeris engizip, tyıym salynǵan jabdyqty, onyń ishinde túnde qatty dybys shyǵaratyn rezonatorlardy ornatqan.
«Bul kólikter arnaıy aıyppul turaǵyna qoıyldy. Al olardyń ıelerine qatysty QR ÁQbK-niń 590-baby 5-bóliginde kózdelgen quqyq buzýshylyq negizinde ákimshilik hattama jasaldy. Sonymen qatar, ótken mereke jáne demalys kúnderi mas kúıinde kólik júrgizgen 10 júrgizýshi ustaldy. Taǵy kólik aıdaý quqyǵynan aıyrylǵan eki júrgizýshi anyqtaldy. Aldyńǵy áınekteri qarańǵylanǵan 76 avtokólik, jalǵan memlekettik tirkeý nómirimen júrgen tórt kólik anyqtalyp, memlekettik tirkeý nómirlik belgisi joq 23 kólik ustaldy»,- dedi Almaty qalasy PD Jergilikti polıtsııa qyzmeti basqarmasynyń bastyǵy Manap Sattarov.
Jol júrý erejesin buzǵan barlyq júrgizýshige tıisti shara qoldanyldy.
