Almatyda tumaýǵa qarsy vaktsınanyń 200 myńnan astam dozasy satyp alyndy
ALMATY. QazAqparat - Almatyda tumaýǵa qarsy jappaı egý bastaldy. Bul týraly Óńirlik kommýnıkatsııalar qyzmetiniń alańynda qalalyq sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova málim etti, dep habarlaıdy QazAqparat tilshisi.
Tegin vaktsına birinshi kezekte qarttar men júkti áıelderge, dıspanserlerde em qabyldaıtyn jandarǵa beriledi. Sondaı-aq balalar úıi men mektep-ınternattaryna da tegin taratylady.
Onyń aıtýynsha, bıyl jergilikti bıýdjet esebinen 130 myń doza reseılik «Grıppol plıýs» vaktsına satyp alyndy, qosymsha taǵy 80 myń ekpe jetkiziledi. Barlyǵy - 210 myń doza.
«22 qyrkúıektegi jaǵdaı boıynsha Almatyda 65 067 adam tumaýǵa qarsy egildi, bul qala turǵyndarynyń jalpy sanynyń 3,0%-yn quraıdy. Onyń ishinde 16 045 medıtsına qyzmetkeri, 5 448 jıi aýyratyn jáne dıspanserlik esepte turǵan balalar, 2 828 júkti áıel, 2 313 jabyq mekemeler kontıngenti (qarttar úıi men balalar úıi), 5 445 mektep oqýshysy, 25 203 sozylmaly aýrýy bar eresekter. Jekemenshik medıtsınalyq ortalyqtarda aqyly negizde 14 adam vaktsına saldyrdy»,- dedi spıker.
Spıkerdiń sózinshe, Almatyda JRVI, tumaýmen aýyratyndarǵa medıtsınalyq kómek kórsetý úshin 142 avtokólik bólindi. Sondaı-aq, aýrýhanalarda naýqastardy emdeý úshin 444 oryn qosymsha bólinip otyr.
Epıdemıologııalyq maýsymda tumaýǵa qarsy ekpe salatyn jekemenshik alty medıtsına uıymy qyzmet kórsetedi.
