Almatyda tumaýǵa qarsy egý naýqany bastaldy
ALMATY. QazAqparat - Almaty turǵyndary tumaýǵa qarsy ekpe qabyldaı bastady, dep habarlaıdy QazAqparat tilshisi.
Bıyl qalada densaýlyq saqtaý basqarmasynyń sheshimimen reseılik «Grıppol+» ekpelerin salýǵa ruqsat etilgen. DDSU boljamyna sáıkes, 2018-2019 jylǵy maýsymda álemde A tıpti - Mıchıgan jáne Sıngapýr, B tıpti - Kolorado shtamdary taralady.
Jyldaǵy dástúrge sáıkes Almatyda da 1 qazannan bastap ekpe qabyldaý maýsymy bastaldy.
Jetisý aýdanyndaǵy №11 emhana qysqy maýsymda kúshine enetin tumaýǵa qarsy atalǵan ekpeniń 2800 dozasyn aldyrǵan. Búginde atalǵan ýchaskede 110 adam ekpe saldyrdy.
«Maýsym sońyna deıin jetkilikti dep 2800 doza ekpe aldyrdyq. Onyń ishinde 110-yn halyqqa salyp úlgerdik. Negizi, ekpe salý merzimi tumaý maýsymynan erterek, qazan-qarashada bastalady. Jeltoqsan aıynan bastap ımmýnıteti álsiz adamdar tumaýǵa shaldyǵýy múmkin. Ásirese, balalar, qarııalar, adam kóp shoǵyrlanǵan jerde jumys jasaıtyn azamattar tumaý vırýsyna álsiz keledi. Ekpe salmas buryn kelýshige aqparat beremiz. Ne úshin? Qalaı salynady? Qandaı nátıje beredi? Osyndaı suraqtarǵa jaýap beremiz. Patsıent mindetti túrde aldyn ala terapevt qaraýyna jiberiledi. Terapevten ruqsat bolǵan jaǵdaıda ǵana ekpe salynady. «Grıppol+» vaktsınasyn salǵan soń tek 8-12 kún ótkende ǵana ımmýnıtet paıda bolady», - dedi atalǵan emhananyń epıdemıolog dárigeri Raıhan Ospanova. 
Mamandardyń aıtýynsha, atalǵan ekpeni 6 aılyq baladan bastap 60 jastan asqan qarııalar da qabyldaı beredi. Tipti júktiliktiń 2-3 trımestrinde de saldyrýǵa bolady.
2018 jyly osy ýchaske boıynsha atalǵan sanatqa 2822 adam kirgen. Al byltyr 2360 adam ekpe qabyldaǵan.
Dárigerler ekpeni tumaýmen aýyrǵan, asqynýdyń joǵary qaýpi bar adamdar alýy tıis dep sanaıdy. Onyń ishinde 60 jastan asqan, mektep jasyna deıingi balalar, mektep oqýshylary, sozylmaly somatıkalyq aýrýy bar naýqastar, ótkir respıratorlyq ınfektsııalarmen aýyratyn eresekter men balalar bar. Atap aıtqanda, bronh demikpesi, sozylmaly búırek aýrýlary, qant dıabeti, metabolıkalyq aýrýlar, aýtoımmýndyq aýrýlar, allergııalyq aýrýlar (taýyq aqýyzyna allergııadan basqa), sozylmaly anemııa, týa bitken nemese keıingi ımmýndyq jetispeýshilik, AQTQ juǵý jaǵdaıynda da tumaýdan ekpe alǵan jón.
Sondaı-aq, ekpeni óz kásibine baılanysty tumaýmen aýyrý nemese ony basqalarǵa juqtyrý qaýpi joǵary adamdar alýy tıis.
