Almatyda tumaý men JRVI juqtyrǵandar sany artty
Bul týraly Óńirlik kommýnıkatsııalar qyzmetinde ótken baspasóz máslıhatynda qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova málim etti, dep habarlaıdy QazAqparat tilshisi.
Spıkerdiń sózinshe, megapolıste 8860 bala aýyryp jatyr, bul jalpy naýqastyń 64,2 paıyzy. Jalpy epıdemıologııalyq maýsymda Almatyda barlyǵy JRVI- diń 343 417 jaǵdaıy tirkeldi.
«Júrgizilgen zerthanalyq monıtorıng barysynda Almatyda maýsymdyq tumaý vırýsynyń úsh túri, onyń ishinde eki túri A (A/H3N2, A/H1N1 pdm09) jáne V tıpi aınalymda ekeni anyqtaldy. Tumaý juqtyryp, onymen aýyrǵandar 2022 jyly qazan aıynyń basynda tirkelgen. Sonymen qatar, RS vırýsy, rınovırýs, bokavırýs jáne maýsymdyq koronavırýs sııaqty tumaýǵa jatpaıtyn basqa da JRVI vırýstary aınalymda bar», – deıdi Ásel Qalyqova.
Aıtýynsha, tumaýmen aýyrǵandardyń sany - 240. Onyń ishinde V tıpiniń 119 túri (49,6%), A/N3N2 túri – 3 jaǵdaı (1,2%), A/H1N1-09 túri – 118 jaǵdaı (49,2%).
Sonymen qatar, epıdemıolog tumaýdyń aldyn alýdyń eń tıimdi ádisi – der kezinde vakınatsııadan ótý ekenin jetkizdi.
«Tumaý vırýsy jyl saıyn mýtatsııaǵa ushyraýda, sondyqtan tumaýǵa qarsy vaktsınany jyl saıyn epıdemııaǵa deıingi maýsymda (qazan-qarasha) tek sol jyly óndirilgen vaktsınamen birge alý kerek. Vaktsınatsııadan keıin ımmýnıtet 14 kúnnen keıin qalyptasady jáne maýsym boıy saqtalady (1 jylǵa deıin). Qaýipsiz jáne tıimdi vaktsınalar qoljetimdi jáne 60 jyldan astam ýaqyt boıy qoldanylyp keledi»,- dedi ol.
Byltyr táýekel tobyndaǵy adamdardy vaktsınalaý úshin jergilikti bıýdjet esebinen 210 000 doza kóleminde reseılik óndiristiń úsh valentti tumaýǵa qarsy «Grıppol plıýs» vaktsınasy satyp alynǵan.
«2022 jyldyń qyrkúıegi men qarashasy aralyǵyndaǵy epıdemııaǵa deıingi maýsymda qala boıynsha barlyǵy 224 706 adam tumaýǵa qarsy egildi, bul qala turǵyndarynyń 10,51% quraıdy, onyń ishinde «qaýipti toptaǵy» 210 000 adam egildi ( onyń ishinde medıtsına qyzmetkerleri – 230 68, 14 jasqa deıingi balalar – 41 337, júkti áıelder – 10 147, jabyq mekemeler kontıngenti – qarttar men balalarǵa arnalǵan balalar úıleri, 2517 qyzmet alýshy, mektep oqýshylary – 21 075, sozylmaly aýrýlary bar eresekter – 94 828). Jekemenshik medıtsınalyq ortalyqtarda jumys berýshiler esebinen barlyǵy 10576 adam, óz qarajaty esebinen 4130 adam egildi»,- dep atap ótti departament ókili.
Ásel Qalyqova vaktsına saldyrǵandar arasynda tumaý juqtyrý jaǵdaılary tirkelmegenin tilge tıek etti.