Almatyda tumaý qańtar-aqpan aıynda beleń alýy múmkin - dárigerler
ALMATY. QazAqparat - Almatyda qalalyq emdeý mekemeleriniń ókilderi tumaý maýsymyna qatysty baspasóz máslıhatyn ótkizdi, dep habarlaıdy QazAqparat tilshisi.
Almatyda jeltoqsan aıynyń basynan bastap 2 135 balaǵa jedel respıratorly vırýstyq ınfektsııa dıagnozy qoıylǵan. Olardyń 68-i aýrýhanaǵa jatqyzyldy. 2 balada tumaý anyqtaldy.
Dárigerler tumaý aýrýynyń beleń alýy qańtar aqpan aılaryna keletinin aıtty.
«Balalar juqpaly aýrýlar aýrýhanasyna jyl saıyn júzge jýyq adam jatqyzylady, olardyń 30%-y juqpaly respıratorly vırýstyq aýrý dıagnozymen túsedi. 2 adamda V tobyndaǵy grıpp jáne H1N1 tumaýy tabylǵan. Qazirgi kezde aýa raıyna baılanysty tumaý juqpasy beleń alyp keledi. Bizde patsıentterdi qabyldap, emdep jazýǵa barlyq jaǵdaı jasalǵan. Bólimshelerde dárigerler táýlik boıy qabyldaý júrgizedi. Tumaýdyń qarqyny qańtar-aqpan aılarynda údeı túspek», - dedi Balalar juqpaly aýrýlar aýrýhanasynyń bas dárigeri Erjan Seralın.
Mamandar tumaý aýrýynyń aldyn alý úshin karantın jarııalaýǵa qajettilik joq dep sanaıdy.
«Bıyl karantın joq. Tumaý vırýsy árıne, mýtatsııaǵa ushyrap, ózgerip jatyr. Biraq, klımattyq kezeńde agressıvti aǵym baıqalmaıdy. 2009 jyly bul syrqat biraz adamnyń ómirin qıdy. Bıyl ondaı aýyr kórinis joq. Aıta keterligi, bizdiń aýrýhanalar barlyq vırýsqa qarsy dárilermen tolyq qamtylǵan», - dedi Almaty qalalyq juqpaly aýrýlar aýrýhanasy bas dárigeriniń orynbasary Tamara Otaǵanova.
Almaty ákimdigi tumaýǵa qarsy reseılik óńdirýshilerden 90 myń vaktsına satyp alyndy. Tegin vaktsına júkti áıelderge, zeınetkerlerge, erekshe qajettiligi bar adamdar men jetimderge salynady. Al, jekemenshik klınıkalarda vaktsınanyń quny 2 500 teńgeden bastalady.
