Almatyda tuǵyrdan shańǵymen sekirýden Qurlyqtyq kýbok jarysy ótedi
ASTANA. Tamyzdyń 31-i. QazAqparat /Marlan Jıembaı/ - Qyrkúıektiń 23-i men 26-sy aralyǵynda Almatyda tuǵyrdan shańǵymen sekirýden Qurlyqtyq kýbok jarysy ótedi. Bul týraly búgin QR Sport jáne týrızm mınıstrliginde qysqy Azıada oıyndaryna shańǵyshylardyń daıyndyǵy máselelerine oraı ótken jıyn barysynda atalǵan Mınıstrlikke qarasty Sport komıtetiniń tóraǵasy Elsııar Qanaǵatov málim etti.
Sport jáne týrızm mınıstrligi qysqy Azıada oıyndarynyń baǵdarlamasyna engizilgen sporttyń barlyq túrleri boıynsha synaq jarystarynyń tizbesi bekitilgenin atap ótken ol, «alǵashqy synaq jarys qyrkúıektiń 23-i men 26-sy aralyǵynda Almatyda tuǵyrdan shańǵymen sekirý boıynsha Qurlyqtyq kýbok úshin ótedi», dedi.
Sonymen qatar Komıtet tóraǵasynyń atap ótýinshe, qazirgi ýaqytqa atalǵan jarysqa daıyndyq barysy josparǵa sáıkes júrgizilip jatyr. Oǵan qatysýǵa 8 elden 48 sportshy nıet tanytyp otyr.
Esterińizge sala keteıik, 2011 jylǵy Azıadany Almatyda ótkizý jónindegi sheshim 2006 jylǵy qańtardyń 5-inde Kýáıtte qabyldanǵan bolatyn. Odan keıin 2007 jylǵy qazannyń 29-ynda Makaoda ótken Azııa olımpıadalyq keńesiniń 51- sessııasynda osy uıymnyń atqarýshy komıtetiniń músheleri Azıadany Almatymen qosa Astanada ótkizý týraly Qazaqstan tarapynyń ótinishin qanaǵattandyrdy.
Baǵdarlama boıynsha konkımen júgirý, mánerlep syrǵanaý, shaıbaly hokkeı, shańǵy, bıatlon, short-trek, taý shańǵysy, shańǵymen tuǵyrdan sekirý, frıstaıl, dopty hokkeı (bendı), qysqy sporttyq baǵdarlaý syndy sporttyń 11 túrinen jarystar ótkizý josparlanyp otyr. Dopty hokkeı jáne qysqy sporttyq baǵdarlaý syndy sport túrlerinen jarystar olarǵa tórt eldiń komandalary qatysý týraly ótinish bergen jaǵdaıda ǵana ótkiziledi. Sporttyń eki túrinen, atap aıtqanda konkımen júgirýden, erler arasyndaǵy dopty hokkeıden jarystar Astanada ótedi. Azıadada sporttyń 11 túrinen barlyǵy 59 medal jıyntyǵy sarapqa salynady. Jarysqa Azııanyń 40-tan astam memleketinen 3 myńǵa jýyq sportshy qatysady, sondaı-aq joǵary laýazymdy qonaqtar, Azııa elderiniń basshylary, Halyqaralyq olımpıada komıtetiniń, Azııa olımpıadalyq keńesiniń jáne halyqaralyq federatsııalardyń basshylary keledi dep kútilýde. VII qysqy Azııa oıyndarynyń saltanatty ashylý rásimi 2011-inshi jylǵy qańtardyń 30-ynda, jeksenbi kúni Astanadaǵy jańa jabyq stadıonda bolady. Al jabylý saltanaty jáne Azıada týyn tapsyrý rásimi 2011 jylǵy aqpannyń 6-ynda Almatydaǵy «Medeý» muz aıdynynda ótedi.
