Almatyda týǵanyna 10 kún bolǵan náreste koronavırýstan jazylyp ketti
ALMATY. QazAqparat – Almatyda 239 bala koronavırýstan aıyqqan. Bul týraly búgin onlaın brıfıngte Almaty qalalyq balalar klınıkalyq juqpaly aýrýlar aýrýhanasynyń bas dárigeri Erjan Seralın aıtty, dep habarlaıdy QazAqparat tilshisi.
«Covid-19 ınfektsııasymen kúres bastalǵaly beri Almatyda 239 bala koronavırýstan emdelip shyqty. Balalar arasynda ókpe qabynýy boldy. Degenmen kóbi jeńil nemese ortasha aýyr túrimen aýyrdy. Balalardyń barlyǵy din aman. Qazir 9 bala em qabyldap jatyr. Qal-jaǵdaıy birqalypty», - deıdi Erjan Seralın.
Onyń aıtýynsha, keshe aýrýhanadan týǵanyna 10 kún bolǵan náreste shyǵaryldy.
«Keshe 10 kúndik balany shyǵardyq. Birneshe kúnge sozylǵan em-domnan keıin anasy ekeýiniń PTR-testileýi taza bolǵandyqtan aýrýhanadan shyǵardyq», - dedi ol.
Aıta ketý kerek, Qazaqstan boıynsha koronavırýs juqtyrǵandardyń sany 73 468 adamǵa jetti. Almatyda 9 394 adam indetke shaldyqqan. Onyń ishinde qalada 73 adam qaıtys boldy.
