Almatyda týǵannan asqazan-ishek jolynda aqaýy bar 3 jasar balaǵa óte kúrdeli ota jasaldy
Ortalyqtyń málimetinshe, buryn bala ózdiginen tamaqtana almaıtyn, ol asqazandaǵy arnaıy tútikshemen as ishetin.
Operatsııa nátıjesinde balanyń týǵannan tamaq ótpeıtin óńeshi asqazanǵa jalǵandy. Ota 5 saǵatqa sozylǵan. Endi óńeshtiń qyzmetin asqazannyń bir bóligi atqarady jáne bala ózi tamaqtana alady.
Hırýrgııa bóliminiń meńgerýshisi, medıtsına ǵylymdarynyń doktory Nurlan Ahparov týa bitken as qorytý joly aqaýlaryn hırýrgııalyq jolmen túzetý salasynda tájirıbesi mol.
Búginde balanyń jaǵdaıy jaqsy, ol reanımatsııadan bólimshege aýysty, ózi tamaqtanady.
Jyl saıyn Pedıatrııa jáne balalar hırýrgııasy ǵylymı ortalyǵyna óńirlerden kelgen 300-den astam balaǵa týa bitken as qorytý organdary aqaýy boıynsha operatsııa jasalady. Sheteldik mamandardyń kómeginsiz óńeshti aýystyrý operatsııasy Qazaqstanda tek osy ortalyqta jasalady, jylyna orta eseppen osyndaı 6-7 operatsııaǵa túrli ádisteme qoldanylady.
«Bala bitkende uryqtyń damýyna túrli faktor áser etýi múmkin, sonyń saldarynan náreste aýrý bolyp týady. Sondyqtan, ana densaýlyǵyn kútý, júkti áıelderdi ýaqtyly esepke alý jáne olardy únemi dınamıkalyq baqylaý óte mańyzdy», delingen habarlamada.