Almatyda «Týǵan jer» baǵdarlamasynyń iske asý barysy baıandaldy
«Qala ákimdiginde túrli sala mamandarynan quralǵan jumys toby jasaqtalǵan. Sondaı-aq, akademıkter, shyǵarmashylyq ókilderi, saıası partııa ókilderi, barlyǵy 28 adamnan turatyn sarapshylar toby bar. Atalǵan qos toptyń atqarýshy organy retinde 9 qalalyq basqarmanyń qyzmetkerleri kirgen jobalyq keńse taǵaıyndaldy.
Keńse jetekshisi - ishki saıasat basqarmasy bóliminiń jetekshisi Laýra Іrgebaeva», - dedi qala ákiminiń orynbasary Arman Qyryqbaev.
Aıta ketý kerek, atalǵan baǵdarlama aıasynda qalada 84 shara belgilengen.
Bilim berý salasynda mektepterde «Týǵan jerdiń tarıhy» fakýltatıvti pán ótkiziledi. Sabaq barysynda muǵalimder Almatynyń 1000 jyldyq tarıhyn baıandap beredi.
Sondaı-aq, oqýshylar arasynda týǵan el tarıhyn tanýdan baıqaý ótedi. Jas tarıhshylar sleti, ǵylymı-tájirıbelik konferentsııa josparlanyp otyr.
Aımaqtyq ekologııalyq mádenıetti damytý maqsatynda PIK-ter, kommýnaldyq qyzmet ókilderi arasynda baıqaý, senbilikter, tarıhı mádenı eskertkishterdi tazalaý josparlanýda.
«Kishi otandy qoldaý» baǵdarlamasy boıynsha qaladaǵy materıaldyq kómekke muqtaj jandar anyqtalmaq. Qazirgi tańda ondaı jandardyń sany 70 myńǵa jetti. Ákimdik monıtorıngti áli de jalǵastyrýda.
Sondaı-aq, ınfraqurylymy eskirgen áleýmettik nysandar kúrdeli jóndeýden ótedi.
«Basty nazardy bıznesti qaıyrymdylyqqa tartýǵa baǵyttaımyz. Qalada 170 myń ShOB sýbektisi bar. Búginde bıznesmender áleýmettik mańyzy bar nysandardy salýda kóp úles qosyp keledi. Atap aıtqanda, quny 12 mlrd teńge bolatyn 20 iri áleýmettik joba júzege asyrylýda. Qarǵaly ózeniniń jaǵalaýyn qalpyna keltirýge 110 mln teńge bıznes ókilderinen tartyldy», - dedi A.Qyryqbaev.
«Týǵan jer» baǵdarlamasyn júzege asyrý jospary respýblıkalyq jumys tobynyń tujyrymdamasyna saı jazyldy.
