Almatyda «Týǵan jer» baǵdarlamasy aıasynda balabaqsha ashyldy

ALMATY. QazAqparat - Almatynyń Medeý aýdanynda «Týǵan jer» baǵdarlamasy aıasynda 30 balaǵa arnalǵan «Han-Tóre» jeke balabaqshasy ashyldy, dep habarlaıdy QazAqparat tilshisi.

Prezıdent Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty halqyna joldaýyn júzege asyrý barysynda Almaty qalasynda mektepke deıingi bilim berý oshaqtaryndaǵy oryn tapshylyǵyn azaıtý máselesi boıynsha jumystar júrgizilip jatqany belgili. Osyǵan baılanysty, bıyl ınvestorlardyń esebinen 15 balabaqsha ashyp, kezekte turǵan bala sanyn 574-ke qysqartý josparlanyp otyr.

«Qazirgi ýaqytta Medeý aýdanynda 18 memlekettik, 50 jekemenshik  balabaqsha bar. Onda barlyǵy 6591 bala tárbıelenip jatyr. Soǵan qaramastan, atalǵan aýdanda 3-6 jas aralyǵyndaǵy 2 157 balaǵa oryn jetpeıdi», - dedi aýdan ákimshiliginen.

Eske sala keteıik, Almaty ákimi Baýyrjan Baıbek «Týǵan jer» baǵdarlamasynyń almatylyqtar úshin orny erekshe ekenin, onyń negizgi bastamalary qala turǵyndary úshin mańyzdy ekenin aıtqan bolatyn. Máselen, byltyr Almatyda jomart kásipkerlerdiń kómegimen 10 sport alańqaıy men 10 balabaqsha ashylǵan bolatyn.

Memlekettik jeke menshik áriptestik jobasy aıasynda 600 oryndyq zamanaýı mektep salynǵan. Sondaı-aq, Almatyda qaıyrymdylyq sharalary men metsenattyq kómekter jıi jasalyp turady.