Almatyda «Túbi bir túrkimiz» festıvali ótti (FOTO)
Osymen segizinshi ret ótkizilip otyrǵan dástúrli festıvaldiń ótkizilý maqsaty - túrkitaný jáne til tarıhy kýrsy boıynsha oqıtyn stýdentterdiń ýnıversıtet qabyrǵasynda alǵan bilimderin etnomádenı turǵyda qaýymǵa tanystyrý, túrki halyqtarynyń tilin, tarıhyn, rýhanı qundylyqtaryn, jazba dástúrin, ádet-ǵuryptary men dúnıetanymyn durys túsinip, qadirlep, qurmetteı bilýge úıretý bolyp tabylady.
Festıval Qyzdar ýnıversıteti stýdentteri men oqytýshylarynan quralǵan ult-aspaptar orkestriniń oryndaýyndaǵy «Shattyq otany» kúıimen jáne myńdaǵan shaqyrym jer basyp kelgen Túrik eli ónerpazdarynyń kontserttik baǵdarlamasymen ashyldy.
«Tanysaıyq siz ben biz», «Ata saltym - asyl qazynam» atty eki bólimnen turǵan festıvaldiń birinshi bóliminde túrik, qyrǵyz, ózbek, bashqurt, ázirbaıjan syndy túrki halyqtarynyń ulttyq án, bıleri oryndalsa, ekinshi bólimde túrki álemindegi ár jurttyń ádet-ǵurpy, salt-dástúri kórsetildi. Atap aıtqanda, túrki jurtyna ortaq «Shildehana, besik toı», «Naýryz», «Bastańǵy», «Sabantoı», «Súndet toı», «Qyna gedjesi», «Kelin túsirý, betashar toıy» qoıylymdary sahnalandy.
Festıval barysynda sonymen qatar, «Halyqtar dostyǵy» bıi, Túrki álemi jastarynyń «Uly dala ulanymyz» ánurany oryndaldy.
«Qyzdar ýnıversıtetiniń stýdentteri oqý ornynda aǵylshyn tilimen qatar, koreı, qytaı, frantsýz, parsy, arab, túrki tilderin oqıdy. Bir sózben aıtqanda, fılolog qyzdarymyz óz mamandyqtarynyń qyr-syrymen qatar, túbi bir túrki jurtynyń barlyq tilderin bilip shyǵady. Al, búgingi sharaǵa keletin bolsaq, bıylǵy festıval Qazaq handyǵynyń 550 jyldyǵy men Qazaqstan halqy Assambleıasynyń 20 jyldyǵyna oraı ótkizildi. Jyl saıyn ótkizilip kele jatqan, dástúrge aınalǵan shara búgingi urpaqqa túbi bir túrki jurtynyń mádenıetin, tarıhyn, salt-dástúrin, tilin nasıhattaı otyra birlikke shaqyrý, ulttar arasyndaǵy yntymaqtastyqty, baýyrlastyqty odan ári nyǵaıtý maqsatynda ótkizilip keledi», dedi atalmysh shara uıymdastyrýshylarynyń biri, qazaq til bilimi kafedrasynyń meńgerýshisi, professor Tynyshtyq Ermekova.
Úzdik óner kórsetkender bilim ordasynyń, Nııde ýnıversıtetiniń jáne Túrki halyqtary mádenı qorynyń arnaıy baǵaly syılyqtarymen, maqtaý qaǵazdarymen marapattaldy.
Aıta keteıik, mamyrdyń 20-sy kúni bastalǵan sımpozıým jumysyna TMD elderi men Túrkııa, AQSh, Qytaı, Koreıa, Nıderlandy, Serbııa syndy álemniń 20-ǵa jýyq memleketi men Qazaqstannyń barlyq aımaǵynan 500-den astam túrkitaný ǵylymymen aınalysatyn ǵalymdar qatysty.
