Almatyda týberkýlezge shaldyǵý birshama tómendedi

ALMATY. QazAqparat - Sońǵy bes jylda megapolıste týberkýlezben syrqattaný kórsetkishi 34 paıyzǵa tómendedi. Bul týraly Almaty óńirlik kommýnıkatsııalar qyzmetiniń baspasóz máslıhaty barysynda qalalyq qoǵamdyq densaýlyq basqarmasynyń ftızıopýlmonologııa ortalyǵynyń dırektory Janar Sápıeva aıtty, dep habarlaıdy QazAqparat tilshisi.

Spıkerdiń sózinshe, qalada syrqattanýshylyqtyń tómendeý dınamıkasy baıqalady. 2017 jyly 100 myń turǵynǵa shaqqanda aýrýdyń 35-ten sál artyq jaǵdaıy tirkelse, 2021 jyly bul kórsetkish 23-ke jetti. Sońǵy 5 jylda ólim kórsetkishi 63,8%-ǵa azaıdy.

«Ftızıopýlmonologııa ortalyǵynda taldaý júrgizildi, ol aýrýdyń tómendeýiniń negizgi sebebi pandemııamen baılanysty shekteýler kezeńinde qalanyń irgeles aımaqtarynan kelgen ishki mıgranttar arasynda týberkýlez jaǵdaılaryn anyqtaýdyń kúrt tómendeýi ekenin kórsetti. Máselen, eger 2019 jyly ishki mıgranttar arasynda anyqtalǵan týberkýlez oqıǵalarynyń sany 168 adamdy qurasa, 2020 jyly – 58 jaǵdaı, 2,5 ese azaıdy»,- deıdi Janar Sápıeva .

Sonymen qatar, ol múmkindigi shekteýli adamdardy mobıldi top úıde baqylaıtynyn aıtty.

«Kún saıyn 8 mobıldi top múmkindigi shekteýli, egde jastaǵy jáne jas balalary bar áıelder arasynda úıde baqylanatyn em júrgizý úshin jeke avtokólikpen shyǵady. Sondaı-aq barlyq naýqas emdeý kýrsy aıaqtalǵanǵa deıin jergilikti atqarýshy organdardyń qoldaýynyń arqasynda 35 myń teńge kóleminde járdemaqy alady. Bıyl áleýmettik kómek kólemi 6,6%-ǵa ósti, qazirgi ýaqytta 830 patsıent kómek alýda»,- dedi ol.

Aıta keteıik, Almaty qalasynda týberkýlezge qarsy kúres aılyǵy aıasynda 40-tan astam medıtsınalyq mekemede ashyq esik kúnderi ótedi.