Almatyda týberkýlezben kúres aılyǵy bastaldy
ALMATY. QazAqparat – Dúnıejúzilik týberkýlezge qarsy kúres kúnine arnalǵan aılyq bastaldy. Pandemııany eskere otyryp, is-sharalar onlaın túrde ótkiziledi. Bul týraly brıfıng barysynda Ulttyq ftızopýlmonologııa ortalyǵynyń dırektory Málik Ádenov aıtty, dep habarlaıdy QazAqparat tilshisi.
«Basty mindet – «týberkýlezdiń úkim emes ekenin» aıtý. Aılyqtyń maqsaty halyqqa týberkýlezdi tekserý men emdeý qoljetimdi ekeni túsindirý», - deıdi Málik Ádenov.
Onyń aıtýynsha, álemdik deńgeıde atalyp ótetin aılyqtyń mańyzy zor. Dúnıejúzilik týberkýlezge qarsy kúres kúniniń urany – «Týberkýlezge qarsy kúreste seniń de óz úlesińdi qosatyn ýaqytyń keldi».
«Týberkýlezben aýyrmaý úshin salaýatty ómir saltyn ustaný mańyzdy. Jeke gıgıena jáne aldyn alý sharalaryn saqtaý kerek. Maska rejımi men áleýmettik qashyqtyqty saqtaý COVID-19 sııaqty aýa tamshylarymen beriletin týberkýlezdiń taralýyn boldyrmaýǵa oń áser etedi»,- deıdi ol.
Aılyq aıasynda oqý oryndarynda jáne basqa da uıymdarda aqparattyq-túsindirý jumystary júrgizilip, rolıkter kórsetiledi.
Sonymen qatar, ol aldaǵy 5 jylǵa arnalǵan jańa keshendi jospardyń engizilgeni týraly aıtty.
«Biz bıyl 2021-2025 jyldarǵa arnalǵan jańa keshendi jospar ázirlep, qabyldaýdy josparlap otyrmyz, onda barlyq is - sharalar jazylady, soǵan sáıkes biz bolashaqta jumys isteıtin bolamyz», - dedi Málik Ádenov.
Aıta keteıik, Almatyda sońǵy 5 jyl ishinde týberkýlez aýrýynyń kórsetkishi 42,8% tómendegen.
