Almatyda týberkýlez dıspanseriniń dárigerleri balalardy shıpajaılarǵa zańsyz jiberip otyrǵan

Bul týraly búgin Almaty qalasy prokýrorynyń baspasóz qyzmetinen habarlady.

Balalardy shıpajaı tıptes mamandandyrylǵan mekemelerge jiberýdiń zańdylyq jaqtaryn tekserý barysynda birqatar keleńsiz jaıttar anyqtaldy. Prokýratýra derekteri boıynsha, 16 laýazymdy tulǵa bilim berý jáne densaýlyq saqtaý salasyndaǵy zańnamalardy buzǵandary úshin jaýapkershilikke tartyldy. 16 adamnyń ekeýi jemqorlyq sıpattaǵy zańbuzýshylyq áreketterge barǵan.

QR Densaýlyq saqtaý mınıstriniń «Týberkýlezge qarsy uıymdardyń qyzmeti týraly erejeni bekitý týraly» buıryǵyna sáıkes, Almaty týberkýlez dıspanseri naýqastardy týberkýlezge qarsy mamandandyrylǵan shıpajaılarǵa, al balalardy shıpajaı tıptes mektepke deıingi jáne mekteptik mekemelerge jiberýmen aınalysady. Alaıda, tekserý barysynda týbdıspanserdiń burmalaýshylyq áreketter jasap, balalardyń medıtsınalyq kitapshalaryna olardyń týberkýlezben aýyratyn balalarmen baılanystary týraly jalǵan maǵlumattar engizip, balalardy shıpajaılarǵa zańsyz jiberip otyrǵandyǵy anyqtaldy.

Sondaı-aq, týbdıspanserdiń ftızıator-dárigerleri jáne balalardy irikteý komıssııasy jekelegen tulǵalarǵa zańsyz basymdyq bergen. Osyǵan baılanysty qalalyq prokýratýra zańbuzýshylyqtardy joıý úshin Almaty densaýlyq saqtaý basqarmasyna usynys engizdi.

«Prokýrorlyq tekserý júrgizýdiń nátıjesinde, QR «Jemqorlyqqa qarsy kúres týraly» zańyna sáıkes, Almaty qalalyq týberkýlez dıspanseriniń balalar bóliminiń meńgerýshisi jumystan bosatyldy. Jáne qaladaǵy aýdanaralyq týberkýlezge qarsy dıspanserdiń balalar bóliminiń meńgerýshisi eskertý retinde tártiptik jaýapkershilikke tartyldy» - delingen baspasóz qyzmetiniń habarlamasynda.