Almatyda týberkýlez deńgeıin tómendetýge baǵyttalǵan trenıng ótip jatyr
ALMATY. 19 qyrkúıek. QazAqparat /Ádilet Musahaev/ - Almatyda medıtsına qyzmetkerleriniń týberkýlezben kúreste biliktilikterin jetildiretin «Sapaly densaýlyq saqtaý» trenıngi ótip jatyr. Oǵan AQSh-tyń halyqaralyq damý (USAID) agenttigi qarjylaı qoldaý kórsetken.
«Týberkýlezdi sátti emdeý úshin naýqastar emdik kýrsty tolyq jazylǵanǵa deıin saqtap, ózgelerge juqtyrmaǵany jón. Ortalyq Azııada emdik kýrstyń buzylý deńgeıi óte joǵary. Onyń sebebi naýqastyń emdik kýrstan bas tartýy men emdelýdiń mańyzdylyǵyn túsinbeýshiligi, bul týberkýlez aýyrýynyń keń etek jaıýyna ákeledi», -deıdi trenıngtiń jattyqtyrýshysy Marına Maksımova.
Týberkýlezdiń barlyq túriniń taralyp ketýin aýyzdyqtaý maqsatynda USAID Qazaqstan úkimetimen yntymaqtasa jumys istep, medıtsına qyzmetkerleriniń biliktiligin arttyrýda osyndaı sharalardy júzege asyrýda. Shara barysynda týberkýlezdi emdeýdegi rejımniń buzylý deńgeıin azaıtý úshin medıtsına qyzmetkerleriniń naýqastarmen jaqsy qarym-qatynas ornatyp, olarǵa durys keńes berýi sóz boldy.
Qyrkúıektiń 23-ine deıin jalǵasatyn bul sharaǵa Almaty oblysy, Shyǵys Qazaqstan oblysy, Ulttyq týberkýlez problemasy ortalyǵynyń ftızıatr mamandary men memlekettik densaýlyq saqtaý salasynyń jáne Qazaq ulttyq medıtsına ýnıversıtetiniń ókilderi shaqyrylǵan.
