Almatyda trotýarmen júrgen kólik júrgizýshi jazalandy
ALMATY. QazAqparat- Almatyda parkte trotýarmen júrgen júrgizýshi jaýapqa tartyldy, dep habarlaıdy QazAqparat tilshisi. Onyń vıdeosy áleýmettik jelide tarady.
Polıtsııa qyzmetkerleri tekserý júrgizdi.
«Tekserý nátıjesinde quqyq buzýshy anyqtaldy. Ol ÁQBtK 596 babynyń 1-bóliginde «Jol júrý erejelerin buza otyryp, jaıaý júrginshiler jolymen, jol jıekterimen nemese trotýarlarmen júrý» boıynsha kózdelgen ákimshilik quqyq buzýshylyq jasaǵany úshin jaýapqa tartyldy», - dedi Almaty qalalyq Polıtsııa departamenti bastyǵynyń orynbasary Rýstam Ábdirahmanov.
Aıta keteıik, Almaty oblysynda adam qaǵyp, oqıǵa ornynan qashyp ketken júrgizýshi izdestirilip jatyr. Belgisiz kólik Talǵar qalasynyń Mendeleev kóshesimen kele jatyp, 18 jastaǵy jaıaý júrginshini qaǵyp ketti. Aýyr jaraqat alǵan jábirlenýshi sol jerde kóz jumdy.
