Almatyda trotýarlardy qardan tazartý jumystary baqylanady
ALMATY. QazAqparat – Almatyda qardyń kóp mólsherde túsýine baılanysty jaıaý júrginshiler joldary men trotýarlardy tazalaý jumystary baqylaýǵa alyndy, dep habarlaıdy QazAqparat tilshisi.
Bul týraly ákimdiktiń baspasóz ortalyǵynda ótken brıfıngte Almaty qalasynyń Jasyl ekonomıka basqarmasy basshysynyń orynbasary Dıas Ahmetqalıev málimdedi. Brıfıngke Almaty qalalyq polıtsııa departamentiniń jergilikti polıtsııa qyzmetiniń bastyǵy Tórehan Isın jáne Almaty qalalyq qutqarý qyzmetiniń bastyǵy Dmıtrıı Chýhontsev qatysty.
16 aqpanda Almatyda jańbyr jaýyp, sońy qarǵa ulasty. Qalanyń kommýnaldyq qyzmetteri megopolıs kóshelerin qardan tazartý jumystaryn áli de jalǵastyrýda.
Jasyl ekonomıka basqarmasy basshysynyń orynbasary D.Ahmetqalıevtiń aıtýynsha, 50 ınspektor jaıaý júrginshiler aımaqtary men trotýarlardaǵy qardyń tazartý jumystaryn baqylaıdy.
«Qalanyń jaıaý júrginshiler bóliginde tekserý jumystary júrgizilýde. Aýdan ákimdikterinde, abattandyrý bóliminde, kommýnaldyq sharýashylyqta jáne jasyl ekonomıka basqarmasy bul jumysty baqylaýǵa aldy. Búgin keshke deıin qalany qardan tazartý jumystary aıaqtalady», - dedi D.Ahmetqalıev.
Óz kezeginde, Almaty qalalyq qutqarý qyzmetiniń bastyǵy Dmıtrıı Chýhontsev turǵyndardy taýǵa shyqpaýǵa jáne kólikterin aǵashtyń túbine qoımaýǵa shaqyrdy.
