Almatyda trolleıbýstar toqtap tur
ALMATY. QazAqparat - Almatyda Abaı kóshesinde trolleıbýs keptelisi paıda boldy. Ótegen batyr kóshesine jetpeı 10-15 trolleıbýs biriniń artynan biri tizilip tur, dep habarlaıdy QazAqparat tilshisi oqıǵa ornynan.
Tótenshe jaǵdaıǵa baılanysty Green Bus dırektory Baýyrjan Kýlıshevke habarlastyq.
«Trolleıbýs joly 1 saǵatqa toqtatyldy. Óıtkeni, kontakt jelisiniń kóldeneń jáne boılyq trostary úzilip ketken. Bul apatty qalpyna keltirý úshin 2 brıgada jumys istep jatyr. Elektr qyzmeti de oqıǵa ornynda jelini jóndeýde», - dedi Baýyrjan Kýlıshev.
Onyń aıtýynsha, shamamen bir saǵattan soń trolleıbýstar shtattyq rejımde jolaýshylar tasymaldaýǵa kirisedi.
