Almatyda trolleıbýs jelileri jańartylady

ALMATY. QazAqparat - Almatynyń Jolaýshylar kóligi jáne avtomobıl joldary basqarmasy trolleıbýs jolynyń baılanys-kabeldik jelilerin rekonstrýktsııalaý boıynsha aýqymdy jobany ázirledi, dep habarlaıdy QazAqparat tilshisi.

Hatta joba júzege assa, trolleıbýs reısteriniń sany kóbeıedi delingen.

Almaty trolleıbýsynyń tarıhy 1944 jyldan bastalady. Sodan beri jyljymaly quram jańartylyp, jańa jeliler ashyldy. Qala ınfraqurylymy men turǵyndardyń sany jyldam ósip jatyr. Halyqtyń qajettiligine saı  búgingi baılanys-kabeldik jelileri trolleıbýstardy jelilerge shyǵarýdy tolyq qamtamasyz ete almaıdy.

«Trolleıbýs reısteriniń barlyq problemasy tozyǵy jetken jelilerdiń sebebinen bolyp otyr. Kún saıyn trolleıbýs júrgizýshisiniń kólikten shyǵyp, symyn qolymen jelige salyp júrgenin kórip júrmiz. Bul jolaýshynyń ýaqytyn alýmen qosa, júrgizýshiniń ómirine qaýip tóndiredi. Onyń ústine, qoldanystaǵy baılanys-kabel jelisiniń standartty kerneýi jyljymaly quramnyń jelige shyǵý sanyn shekteıdi. Jelini jańartý jumysy marshrýttyń turaqty qatynaýyn keminde eki esege jaqsartady», - dedi Jolaýshylar kóligi jáne avtomobıl joldary basqarmasynyń basshysy Talǵat Hoschanov.

Jańartý jumystary barysynda 172,62 km baılanys jelisi jóndelip, 529 baılanys jelisiniń tirekter men oqshaýlanǵan aspaly júıeler, boılyq kótergish arqany men trolleıbýstyń baılanystyrǵysh symdary aýystyrylady. 39,81 km qashyqtyqqa ASB kabelderi tartylady.

Hatta kórsetilgendeı trolleıbýs jelilerin jańartý jumysyna kóshelerdi, trotýarlar men kógaldardy qalpyna keltirip, trolleıbýs joldaryn jaryqtandyrý sapasyn jaqsartý da kiredi. Jospardy júzege asyrý 2019 jyly bastalady.

Tańsholpan Begalyqyzy