Almatyda trolleıbýs symyna ilinip qalǵan jigitti toq soqty
ALMATY. QazAqparat - Almatyda trolleıbýs symyna ilinip qalǵan jigitti toq soqty. 23 jastaǵy jigit baǵdarshamnyń baǵanyna ilinip jumys istep jatqan, dep habarlaıdy QazAqparat tilshisi.
Er adam qazir hal ústinde jatyr.
Oqys oqıǵa Abaı jáne Manas kósheleriniń qıylysynda bolǵan. Kýágerlerdiń aıtýynsha, jigit baǵdarsham baǵanyna shyǵyp alyp jumys istep turǵan.
Kenetten abaısyzda qasynan ótip bara jatqan trolleıbýstyń symyna ilinip qalǵan. Oqıǵa saldarynan jigitti toq soqty.
Shuǵyl jetken jedel járdem qyzmetkerleri jigitti dereý №12 aýrýhanaǵa alyp ketti. Dárigerler jigitti jan saqtaý bólimine jatqyzdy.
«Qazir naýqastyń jaǵdaıy óte aýyr. Onyń ómirin saqtap qalý úshin kosılıým jınaldy. Mamandar barlyq qajetti sharalardy júrgizip jatyr», - dedi qalalyq Densaýlyq saqtaý basqarmasynyń baspasóz qyzmetinen.
Kóp jaǵdaıda trolleıbýstyń kontaktilik jelisinde elektr kerneýi 600 voltke teń bolatyndyǵyn aıta ketý kerek.
Aıta ketý kerek, byltyr Almatyda jaýyn kezinde úsh adamdy kóshede toq urǵan bolatyn.
