Almatyda trolleıbýs qaǵyp ketken er adam kóz jumdy
ALMATY. QazAqparat - Almatyda jaıaý júrginshini qaǵyp ketken trolleıbýs júrgizýshisi apat kezinde ózin jaısyz sezingen. Onyń qan qysymy kóterilip ketken. Bul týraly «Almatyelektrotrans» AQ ókilderi Facebook-tegi paraqshasynda jazdy, dep habarlaıdy QazAqparat tilshisi.
Kýágerlerdiń aıtýynsha, №12-shi baǵyttaǵy trolleıbýs júrgizýshisi Q.Sátbaev kóshesiniń boıymen jolaýshysyz avtoparkke qaraı bet alǵan. Júrgizýshi Rozybakıev kóshesine jetpeıtin tusta turǵan Lexus GS 300 jáne Honda Accord markaly eki kólikti soqqan.
«5 qańtarda, shamamen saǵat 23:20-de trolleıbýs júrgizýshisi Sátbaev kóshesimen shyǵysqa qaraı avtoparkke kele jatqan. Rozybakıev kóshesine jetkende onyń qan qysymy kóterilip, ol esinen tanyp, kóshede turǵan Lexus GS300 jáne Honda Accord kólikterine soǵyp, trotýarǵa shyǵyp ketken jáne jaıaý adamdy qaǵyp ketken. Oqıǵa ornyna polıtsııa qyzmetkerleri, tasymaldaýshy kompanııa ókilderi, jedel járdem keldi. Kelgen dárigerler jaıaý júrginshige medıtsınalyq kómek kórsetti, biraq er adam aýyr jaraqattan sol jerde qaıtys boldy. Marqumnyń otbasyna ótemaqy tólenedi», - dep jazdy «AlmatyElektrotrans» AQ .
