Almatyda trolleıbýs ınfraqurylymyn modernızatsııalaý kelesi jyly aıaqtalady
ALMATY. QazAqparat - Almatyda trolleıbýstar qoldanystan shyǵarylmaıdy. Bul týraly qala ákimi Baqytjan Saǵyntaev «Almaty» telearnasyndaǵy Akimat Live baǵdarlamasynyń tikeleı efırinde aıtty, dep habarlaıdy QazAqparat tilshisi.
«Trolleıbýstardan bas tartý kún tártibine qoıylǵan joq jáne qoıylmaıdy da. Bıyl pandemııa saldarynan shyǵyndar qysqartyldy. Jyl sońyna deıin 16 kóshedegi baılanys jelisi jańaratyn bolady. Negizi 172 shaqyrym jelini aýystyrý kerek. Trolleıbýs ınfraqurylymyn tolyqtaı modernızatsııalaýdy 2021 jyly aıaqtaýdy josparlap otyrmyz», - dedi Almaty ákimi.
Baqytjan Saǵyntaevtyń sózine qaraǵanda, 2020 jyldyń sońyna deıin Jandosov, Seıfýllın, Qabanbaı batyr, Áýezov, Rozybakıev, Jubanov, Emtsov, Qaldaıaqov, Pýshkın kósheleri men Rysqulov jáne Raıymbek dańǵyldarynyń boıyndaǵy eskirgen baılanys jelileri alynyp tastalady jáne qaıta montajdalady.
Buryn kabeldi jáne baılanys jelilerine kúrdeli jóndeý jumystary 2000 jyly ǵana júrgizilgen. Kún saıyn segiz baǵyt boıynsha jolaýshy tasymaldaýǵa 160 trolleıbýs shyǵatyn bolady. Aı saıyn trolleıbýspen shamamen 2,5-3 mln adam júredi eken. Trolleıbýs jelisiniń jalpy uzyndyǵy 191 shaqyrym.
