Almatyda «Travıata» operasynyń jańa qoıylymy tanystyryldy (FOTO)
ALMATY. QazAqparat - Búgin Almatyda Abaı atyndaǵy Qazaq memlekettik akademııalyq opera jáne balet teatrynda ıtalııalyq kompozıtor Djýzeppe Verdıdiń «Travıata» operasynyń jańa qoıylymy tanystyryldy.
Osy sharaǵa arnalǵan baspasóz máslıhatyna teatr dırektory Asqar Bóribaev, qoıýshy-rejısser Láılim Imanǵazına, qoıýshy-sýretshi Vıacheslav Okýnev, bas dırıjer Nurlan Jarasov jáne teatr solısteri qatysty.
«Verdıdiń «Travıata» operasy bizde talaı jyldan beri qoıylyp kele jatyr. Biz aldymyzǵa álemge belgili klassıkalyq spektaklderdi jańǵyrtý mindetin qoıdyq. Sodan, sahnany bezendirý, kıimderdi jańartý jumystary qolǵa alyndy. Spektakl jańa turǵydan qoıylady. Al mýzyka jaǵyna keler bolsaq, keı jerlerinde avtorlyq mátin men hormen aıtylatyn jerleri qalpyna keltirildi», - dedi A. Bóribaev.
Odan basqa, shyǵarmashylyq ujym teatr áleminde bolyp jatqan álemdik qubylystarǵa toqtaldy.
«Qazir kompıýter tilimen aıtqanda búkil álemde opera óneri «qaıta júktelip jatyr» deýge bolady. Men Italııada bolǵan kezimde jergilikti teatr ókilderi «zalǵa kirgende tek shashtaryn aq shalǵan adamdardyń ǵana otyratynyn» kóretinderin aıtyp, ókinish bildirdi. Demek, batysty da óskeleń urpaq operaǵa onsha qyzyqpaıdy degen sóz. Sondyqtan, álemniń klassıkalyq teatrlarynda qazir rejıssýra klassıkalyq jáne eksperımentaldyq bolyp ekige bólingen. Olar zalǵa kórermenderdi túkpilikti jańa, tyń ıdeıalarmen shaqyrǵysy keledi. Sonyń arqasynda zalda kórermender arasynda jastar da kóbeıip jatyr deýge bolady. Biraq biz «Travıata» operasynda eksperıment jasaýǵa barǵan joqpyz. Jańa qoıylym degen bul ár kez túbegeıli ózgeristermen kórermenniń jaǵasyn ustatý degen sóz emes qoı. Men tek óz aldyma bul tarıhty qarapaıym tilmen shynaıy túrde túsindirgim keldi», - dedi L. Imanǵazına.
Operanyń jańa qoıylymyn daıyndaýǵa kóp adam jumyldyrylǵan.
«Kez-kelgen qoıylym - bul úlken ujymdyq jumys. Biz tıisti qarjy bólgeni úshin QR Mádenıet jáne sport mınıstrligine alǵysymyzdy bildiremiz. Kez-kelgen qoıylymda grımerler, kıim, aıaq kıim tigetin tsehtar jáne basqa da tsehtar jumys atqarady. Mysaly, bizde bıyl jańa 50 frak tigildi. Al bizdiń ujymda 60 adam jumys isteıdi. Osy jańa qoıylymǵa kerekti alǵashqy nobaılardy biz osy jyldyń qańtar aıynda alǵanbyz. Daıyndyq jumystary sol aıdan beri júrgizilip kele jatyr», - dep sózin qorytyndylady teatr dırektory.
