Almatyda Transformer júr
ALMATY. QazAqparat - Almatynyń Ortalyq mádenıet jáne demalys saıabaǵy demalýǵa kelgen balalarǵa úlken tosyn syı ázirledi.
Astana kúni qarsańynda saıabaqta Transformer, «Juldyzdy soǵys» keıipkeri Dart Veıder, «Chýjoı» fılminiń keıipkerleri serýendep júr. Kishkentaı kelýshiler olarmen birge sýretke túsip, «Zýmbo» bıin bılep shat-shadyman bolýda.
Sonymen qatar, almatylyqtar Astanaǵa degen quttyqtaýyn zeńgir kókke ushyrdy.
Halyq toltyrǵan eń úlken quttyqtaý qaǵazyn aspanǵa dırıjabl kóterdi.
Al, erler arasyndaǵy eń myqtyny anyqtaýǵa múmkindik beretin «ARMaTÝRa» saıysy áli jalǵasýda.
Tańǵy 10-da bastalǵan qyzý dodada almatylyq jigitter qol kúresinen, armlıftıng, arm faıt, kir kóterý, qyzdy ıyǵyna otyrǵyzyp jerden serpilý t.b. 10 sporttyq oıyn túri boıynsha baq synasýda. Top jarǵandar jańadan ashylǵan rekordtar kitabynan qurmetti oryn alatyn bolady.
Sondaı-aq ziltemirdi 100 keliden artyq salmaqta baǵyndyrǵan jigitter «100+» erler klýbyna múshelikke ótedi.
«Jaqsy nátıje kórsetkender fınalǵa shyǵyp, ákimniń kýbogy úshin baq synaıtyn bolady. Sondaı-aq taza kúmisten quıylǵan «ARMAaTýra» belgisi bar saqınaǵa ıe bolady», - dedi uıymdastyrýshylar.
