Almatyda «Transfert, translıatsııalaý jáne jańa bilimderdi generatsııalaý» atty ǵylymı-ádistemelik semınar ótti

dep habarlaıdy QazAqparat.

Semınarda qazaq orta mektepterindegi mýzykalyq bilim berýdiń jańa júıesi - «Murager» baǵdarlamasy tanystyryldy.

«Biz bul baǵdarlamany aýyzeki damyǵan halyqtyq dástúrge súıene otyryp jasadyq. Al dombyra aspaby mýzykalyq ónerdi dástúrli júıede úıretýdiń basty quraly bolyp tabylady. Baǵdarlamany bolmysymyzdy qalaısha qaıtaramyz degen maqsatpen jasap, 1985 jyldan beri aınalysyp kelemiz. Baǵdarlamanyń bir ereksheligi, dombyrany notasyz, ıaǵnı aýyzsha úıretý ádisi arqyly, jekelep emes, búkil synypqa nemese úlken topqa, tipti 700-den asa adamǵa úıretýge bolady. Sonymen qatar, biz kitap retinde emes, qyzǵylyqty tásilder arqyly, balanyń jasyna sáıkes kórkem jetkizý prıntsıpterin qoldandyq. Budan bólek, biz oqýshylarǵa óleń, jyr shyǵarýdy úıretemiz», dedi baǵdarlamany jasaýshylardyń biri, «Kókil» qazaq mektep-kolledjiniń dırektory Abdýlhamıt Raıymbergenov. Onyń aıtýynsha, árbir dombyra úırengisi keletin adam bul baǵdarlama arqyly aspapty meńgere otyryp, halyqtyq ańyz-kúılermen tanysyp, áńgime-ápsanalarmen mol sýsyndap, dástúrli ónerdiń tereń mazmunyna boılap, ulttyq tanym-kózqarasyn qalyptastyra alady.

«Murager» baǵdarlamasynyń ekinshi avtory Uljan Baıbosynovanyń aıtýynsha, atalmysh baǵdarlama bul kúnde respýblıkamyzdyń barlyq aımaǵynda jalpy bilim beretin orta mektepterde synaqtan ótip oń nátıjelerin bergen. «Qazirgi tańda 61 qazaq orta mektepterinde 8000-nan astam oqýshy osy baǵdarlama boıynsha bilim alýda», dedi ol. Onyń sózine qaraǵanda, jańa júıede jasalǵan «Murager» baǵdarlamasy egemendi el bolyp qalyptasqan shaqta ulttyq keskin-kelbetimizdi aıǵaqtaıtyn basty qural retinde el ishine keńinen taralyp, mýzyka páni boıynsha negizgi standartqa enýin qajet etip otyr.