Almatyda tramvaı jelisi súrilip tastalady
ALMATY. QazAqparat - Almatyda maýsym aıynda kóshedegi tramvaı relsteri alynady. Bul týraly qalalyq ákimdiktiń baspasóz qyzmeti habarlady.
Mamandardyń aıtýynsha, bul kóshedegi jol kólik qozǵalysyn jeńildete túspek.
«Maýsym aıynda tramvaı relsteri súrilip, 18 jol burylysynda ortasha jóndeý jumystary bastalady. Bul óz kezeginde kóshelerdiń kólik ótkizý qabiletin arttyrýǵa yqpal etedi. Shevchenko, Qonaev, Ótepov kóshelerindegi 7,5 shaqyrym bolatyn tramvaı relsteri alynady. Bul ýchaskelerge de ortasha jóndeý jumystary júrgiziledi, bordıýrler rettelip, aryq jaǵalaýlary, beket núkteleri, velosıped joldary kóriktendiriledi», - delingen habarlamada.
Odan bólek Almatyda bıyl uzyndyǵy 83,7 shaqyrym 114 kóshe qosymsha jóndeletin bolady. Depýtattar máslıhattyń sońǵy sessııasynda osy maqsatqa qosymsha 2,5 mlrd teńge bólý jónindegi sheshimdi biraýyzdan qoldady.
«Sonymen qatar, 97 myń sharshy metr trotýar, 130 beket alańdary abattandyrylyp jatyr. 12 magıstraldy jáne uzyndyǵy 31,27 km bolatyn aýdandyq mańyzy bar jol ortasha jóndeýden ótip jatyr. 1 maýsymnan bastap uzyndyǵy 30,75 km bolatyn 19 kóshege ortasha jóndeý jumystary júrgiziledi. Qazirgi kezde Baıtursynov kóshesi, Tımırıazev kóshesinen Abaı dańǵylyna deıingi aımaq qaıta jasalyp, velosıped joldary retke keltirilip jatry. Jandosov kóshesi, Saıyn kóshesinen Taýsamaly eldi mekenine deıingi uzyndyǵy 2,08 shaqyrym jolǵa kúrdeli jóndeý jumystary júrýde. Jalpy, joldardy jóndeý jobasynda kólik qozǵalysy bólikterin 4 jolaqqa deıin keńeıtý, «Qarǵaly» ózeni arqyly ótetin kópirdi qaıta salý, uzyndyǵy 2 km bolatyn velojoldar men uzyndyǵy 4 km bolatyn trotýarlardy abattandyrý da qarastyrylǵan», - dedi ákimdiktiń baspasóz qyzmetinen.
Jalpy alǵanda Almatyda joldarǵa júrgiziletin qurylys- jóndeý jumystaryna jergilikti bıýdjetten 9,5 mlrd teńge bólingen.
