Almatyda tramvaı deposynyń ornyna ne salynatyny belgili boldy
ALMATY. QazAqparat – Almatyda «Depo Evolution Park» burynǵy tramvaı deposynyń ornynda qurylys jumystary jandandy.
Qalalyq ákimdiktiń habarlaýynsha, bul jerde kreatıvti jastarǵa arnalǵan qoǵamdyq park ashylady, dep habarlaıdy QazAqparat tilshisi.
Tujyrymdamaǵa sáıkes, bul nysanda art sheberlik klastary, zerthanalar, oqý zaldary, shoýrýmdar, kıno dárishana zaldary, kórkemóner stýdııasy, kitaphana, kovorkıng ashylady.
Odan bólek qajetti ınfraqurylym ekstrım parki, óner parki, vorkaýt, sport alańdary ashylady.
Bul joba qalalyq keńeste tańdaldy.
Osyǵan uqsas oryndar Nıý-Iork («Haı-Laın»), Parıj, Máskeý qalalarynda bar.
«Bul jerde qonaq úı, turǵyn úı, meıramhanalar salynbaıtyn boldy», - dedi basqarmadan.
Belgili bolǵandaı, buǵan deıin bul jerde nysan salý memlekettik jekeshelik áriptestik aıasynda ınvestorlarmen kelisilgen.
Keıin qoǵamdyq pikir eskerilip, bıýdjet qarajatyna oǵan deıin josparlanǵan loft-ortalyq tańdalyp alyndy.
Depo Evolution Park jobasynyń qurylysyn 2021 jyldyń sońynda aıaqtaý josparlanǵan. Joba quny - 2,5 mlrd teńge.
Esterińizge sala ketelik, 2015 jyly kúzde tramvaı deposynyń jumysy toqtatylǵan bolatyn. Bul sheshim tramvaılardyń qatysýymen bolǵan eki úlken jol apatynan keıin qabyldanǵan edi. Birinshi bolǵan apat saldarynan 5 adam zardap shegip, 17 avtokólik zaqymdalsa, ekinshisinde bir adam zardap shegip, taǵy da birneshe avtokólik zaqymdaldy.
Odan keıin ákimdik tramvaı deposynyń ornyna qoǵamdyq keńistik salý týraly baıqaý jarııalandy.
Aıta ketý kerek, byltyr aqpanda Depo Evolution Park jastar parkinde qurylys jumystary toqtaǵan bolatyn. Odan keıin depo ornynda qonaqúı salynady degen qaýeset taraǵan edi.
