Almatyda tramplınnen sekirýden Álem kýbogynyń qysqy kezeńderine 100 sportshy qatysady
ALMATY. QazAqparat - Almatyda tramplınnen sekirýden Álem Kýbogynyń qysqy kezeńderinde álemniń 100 sportshysy baǵyn synaıdy. Bul týraly búgin ótken baspasóz máslıhatynda QR Tramplınnen sekirý jáne shańǵy qossaıysy boıynsha federatsııanyń prezıdenti Andreı Verveıkın aıtty.
«Bul kezeńde álemge tanymal sportshylar keledi. Erler arasynda 62 sportshy, áıelder arasynda 34 sportshy baǵyn synaıdy. Erteń saıys bastalady. Biraq eń úzdikter senbi kúni óner kórsetedi»,- dedi A.Verveıkın.
Qazaqstan quramasynyń namysyn Radık pen Marat Japarovtar, Sabyrjan Múminov pen Konstantın Sokalenko qorǵaıtyn bolady.
«Saıys óte qatań bolady. Jeńimpaz mynaý bolady dep tap basyp aıta almaımyz. Bizdiń sportshylardyń biri úzdik 30-dyqqa enedi dep senemiz», - dedi federatsııa prezıdenti.
Sporttyq doda 27 aqpanda «Suńqar» halyqaralyq shańǵy tramplıni kesheninde ótedi.
