Almatyda traheıa men kómeı stenozy bar balalarǵa alǵash ret ota jasaldy
Almaty qalalyq Qoǵamdyq densaýlyq saqtaý basqarmasynyń málimetinshe, operatsııa eki balaǵa jasaldy. Operatsııa Almaty ákimdigi men qalalyq Qoǵamdyq densaýlyq saqtaý basqarmasynyń qoldaýymen ótken «Salaýatty urpaq» halyqaralyq ǵylymı-praktıkalyq konferentsııasynyń sheberlik synyby aıasynda jasaldy.
Hırýrgııalyq operatsııa medıtsına ǵylymdarynyń doktory, Reseı balalar hırýrgtary qaýymdastyǵynyń prezıdenti Aleksandr Razýmovskııdiń qatysýymen júrgizildi.
Alǵashqy operatsııa jasalǵan 13 jastaǵy balada jol apaty saldarynan traheıa stenozy dıagnozy bolǵan.
Uzaq ýaqyt boıy naýqastyń ókpesi jasandy jeldetýde bolǵandyqtan traheostomııasy bar apparatta tyrtyq stenozy damyǵan. Nátıjesinde naýqas ortalyqtan shyǵarylǵan soń qaıtadan sol dıagnozben aýrýhanaǵa túsken.
«Biz tynys alý joldaryn qalpyna keltirý úshin traheıa stenozynyń aımaǵyn únemi súmbileýge májbúr boldyq, biraq súmbileý protsesi bala úshin óte aýyr boldy. Bul máseleni tek hırýrgııa ınstıtýtynda nemese shetel klınıkalarynda júrgiziletin hırýrgııalyq aralasý arqyly sheshýge bolady. Endi bizdiń hırýrgtar osy aýrýmen aýyratyn balalarǵa operatsııa jasaı alady. Bizdiń ortalyq úshin bul biregeı tájirıbe jáne úlken jetistik. Professor Razýmovskııdiń bizdiń mamandarǵa osy biregeı operatsııalardy kórsetkeni úlken mártebe», - dedi Almaty qalasynyń Balalar shuǵyl medıtsınalyq kómek ortalyǵynyń bas dárigeri Álibek Smaǵulov.
Qazaqstannyń endovıdeohırýrgtar qaýymdastyǵynyń prezıdenti Vladımır Kotlobovskıı taǵy 2 ota jasady. Olar: kalıı permanganaty krıstalynyń kúıikteri bar balaǵa laparoskopııalyq holetsıstektomııa jasalsa, bir kishkentaı patsıenttiń keýde qýysyn túzetti. Sondaı-aq, professorlar túrli aýrýy bar balalarǵa keńes berip, negizgi emdeý ádisterin usyndy.
«Halyqaralyq konferentsııa aıasynda «Balalar hırýrgııasyndaǵy laparoskopııanyń zamanaýı múmkindikteri. Asqazan-ishek joldarynyń, keýde qýysynyń jáne medıastınanyń endoskopııalyq operatsııalary» taqyrybynda reseılik jáne almatylyq áriptester endoskopııalyq balalar hırýrgııasynyń sheshilmegen máselelerin talqylady.
Master-klasqa qatysý álemdik deńgeıdegi balalar hırýrgtarymen jandy ǵylymı-praktıkalyq qarym-qatynas jasaýdyń biregeı múmkindigi ekeni sózsiz», - dep habarlady Almaty qalalyq Qoǵamdyq densaýlyq saqtaý basqarmasynyń baspasóz qyzmeti.
