Almatyda tozyǵy jetken úıdiń turǵyndary májbúrli túrde shyǵaryla ma
ALMATY. QazAqparat - Almatyda apatty úıler turǵyndardyń 100% kelisimimen buzylady. Bul týraly 2021-2025 jyldarǵa arnalǵan turǵyn úı qoryn jańartý baǵdarlamasynyń tanystyrylymy barysynda «Almaty» áleýmettik-kásipkerlik korporatsııasy» AQ basqarmasynyń tóraǵasy Asqar Bilisbekov aıtty, dep habarlaıdy QazAqparat tilshisi.
Qalada 1930-1975 jyldar aralyǵynda salynǵan apatty 1427 eki qabatty úı bar. Tozyǵy jetken úılerdiń eń kóbi – Túrksib aýdanynda. Munda 607 úıdi qaıta buzyp-salý kózdelgen.
Eski úılerdiń negizgi problemalary: seısmıkalyq, órt qaýpi, sondaı-aq ınjenerlik jelilerdiń joqtyǵy.
«Bul úılerdiń basym bóligi aǵash-qamystan salynǵan. Kirpishten salynǵan úıler - negizinen qalanyń ortalyǵynda. Búgingi kúni 708 apatty úıdi aýystyrý qajet. Jeke ınvestıtsııa arqyly - 458 úı. Búginde onyń 280-de jumys júrip jatyr «, - dedi Asqar Bilisbekov.
Sonymen qatar, ol tozyǵy jetken úıler tek turǵyndardyń ózderi 100 paıyz kelisim bergen jaǵdaıda ǵana buzylatyndyǵyn basa aıtty.
«Eger, mysaly, tozyǵy jetken úılerde turatyn 10 turǵynnyń 9-y kelisip, bireýi bas tartsa, onda buzý bolmaıdy. Májbúrli túrde buzý bolmaıdy, ol tek turǵyndardyń 100% kelisimimen júzege asyrylady», - dep qosty spıker.
Baǵdarlama tetigi boıynsha úı ıesine ýaqytsha nemese turaqty negizde páter beriledi. Turǵyndardy óz aýdandaryna eski úılerdiń ornyna jańa úı salynǵan kezde orala alady. Menshik ıeleriniń qonys aýdarýy turǵyndardyń sanyna qaramastan, páterlerdiń tehnıkalyq pasporttaryna sáıkes « bir bólmege, bir bólme» prıntsıpi boıynsha júzege asyrylady. Eger páter ıesi sharshy metrdi ulǵaıtqysy kelse aqshasyn tóleıýi kerek.
2012-2015 jyldarǵa arnalǵan pılottyq baǵdarlama boıynsha Almatyda 56 tozyǵy jetken úı súrilip, 63 kóppáterli turǵyn úı salyndy. Osy baǵdarlamanyń arqasynda 579 otbasy jańa páterge qonystandy.
Buǵan deıin, 2021-2025 jyldarǵa arnalǵan turǵyn úı qoryn jańartý baǵdarlamasy aıasynda Almatyda 708 eski úı buzylyp, 683 turǵyn úı salynatyny týraly jazǵan bolatynbyz.
Baǵdarlamadaǵy eski úılerdiń tizimi apatty baspana turǵyndarynyń aýdandyq ákimdikterine jıi júginýi negizinde quryldy.
Baǵdarlamanyń operatory - «Almaty» áleýmettik-kásipkerlik korporatsııasy» AQ.
Baǵdarlamada júzege asyrý mehanızminiń eki nusqasy qarastyrylǵan:
- «Almaty» ÁKK jáne jeke ınvestor júzege asyratyn jobalar;
- memlekettik qarjylandyrý arqyly júzege asyrylatyn jobalar.
