Almatyda tozyǵy jetken 2 myń shaqyrymǵa jýyq sý qubyryn aýystyrý kózdelip otyr

ALMATY. QazAqparat - Bıyl Almatyda halyq pen kásiporyndarǵa sýdy úzdiksiz berýdi qamtamasyz etýge baǵyttalǵan sýmen qamtý jáne káriz júıesin jańǵyrtý jumystary jalǵasady. Bul týraly «Almaty sý» MKK baspasóz qyzmeti málim etti, dep habarlaıdy QazAqparat tilshisi.

Jumystardy birneshe baǵytta júzege asyrý josparlanǵan. Eń aldymen obektilerdi, jeliler men jabdyqtardy qysqa daıyndaý, sondaı-aq jelilerdegi apattar sanyn jáne sý shyǵynyn azaıtýǵa baǵyttalǵan.

«2023 jylǵa arnalǵan ınvestıtsııalyq baǵdarlamaǵa sáıkes, sýmen qamtý boıynsha 2,6 mlrd teńge, sý burý boıynsha 584 mln teńgeni quraıdy. Bıylǵa arnalǵan ınvestıtsııanyń negizgi kólemi jelilerdi jańartýǵa baǵyttalady. Sondyqtan jalpy uzyndyǵy 32 shaqyrym bolatyn 25 nysan boıynsha óte tozǵan sý qubyry jelilerin aýystyrý josparlanyp otyr. Injenerlik jelilerdi rekonstrýktsııalaý jumystary barysynda sý úzdiksiz beriletin bolady», - dep habarlady kompanııada.

Almatyda negizgi máselelerdiń biri – tozǵan sý qubyry jelileri bolyp qalyp otyr. Qazirgi tańda Almaty qalasy boıynsha sý qubyry jelileriniń 54,2%-y tozǵan. Sol sebepti 1943 shaqyrym sý qubyry jelisin aýystyrý qajet. Kárizderdiń 56,6%-y tozǵan, ıaǵnı, 1000 shaqyrymnan astam jelini rekonstrýktsııalaý qajet.

Sondaı-aq «Almaty Sý» mekemesiniń málimetinshe, aldaǵy jyldar ishinde bıýdjet qarajaty esebinen Qarǵaly, Aqsaı, Ermensaı jáne Barlyq ózenderinde sý jınaý qurylystary iske qosylyp, on eldi mekende uzyndyǵy 280 shaqyrym sý qubyry jelileri salynatyn bolady.

«Bul 232 myń turǵyndy sýmen qamtýǵa jáne qaladaǵy ortalyqtandyrylǵan sýmen qamtýǵa 100% qoljetimdilikti qamtamasyz etýge múmkindik beredi», - dep habarlady «Almaty Sý» MKK-da.